Sekretáriu Jerál Partidu FRETILIN, Mari Bin Amude Alkatiri. Imajen Tatoli/Egas Critovão

OÉ-CUSSE, 18 juñu 2022 (TATOLI) – Prezidente Autoridade iha Rejiaun Administrativa Espesiál Oé-Cusse Ambeno (RAEOA) no Zona Ekonomia Espesiál Sosiál Mekadu Timor-Leste (ZEESM-TL) dahuluk, Mari Alkatiri propoin ba VIII Konstitusionál atu halo intervasaun hodi define RAEOA-ZEESM sai plataforma foun iha setór públiku no privada.

Eis Prezidente Autoridade RAEOA-ZEESM ne’e, hato’o nia afirmasaun ne’e, bainhira selebra loron aniversáriu kriasaun RAEOA-ZEESM ba tinan ualu (8), ho tema, ‘O Inicío e o Futuru, Uma Refleção Abragente Sobre os Resultados de Dezenvolvimento da RAEOA Numa Visão Futuristica Mellorada’ iha Otél Ambeno Oé-Cusse sabádu  ne’e.

“Ha’u hanoin programa ne’e tenke la’o ba oin, tanba uluk Oé-Cusse tenke sai laboratóriu, atu sosiál ekonómia merkadu no ekonómia atu sai polítika nasionál, atu define fali plataforma foun parseria públiku no privada, la’os fó funsaun sosiál ba setór partikulár no privada de’it no Estadu buka de’it reguladór, la’e Estadu mós tenke intervein iha sentidu pozitivu hodi define plataforma foun intendimentu,” Alkatiri hateten.

Haktuir ba Konstituisaun Repúblika Demokrátika Timor-Leste, artigu 5 dezentralizasaun no artigu 71 Organizasaun Administrativa. Atu implementa artigu sira-ne’e, Governu no Parlamentu Nasionál, tiha ona lei númeru 3/2014, loron 18 fulan juñu, nomoos hetan promulgasaun hosi Prezidente Repúblika kona-bá hamosu Rejiaun Administrativa Espesiál Oé-Cusse Ambeno (RAEOA), no Zona Ekonomia Espesiál Sosiál Merkadu Timor-Leste (ZEESM-TL).

Atu implementa lei refere Governu no Estadu hili ka hutudu no pose ba Mari Alkatiri hanesan Prezidente Autoridade RAEOA no ZEESM TL, ba mandatu tinan lima hahú 2014 termina iha 2019, nune’e mós iha momentu ne’e tempu hanesan halo transférensia podér no devolusaun kompeténsia atu lidera no dezenvolve Rejiaun no Zona ne’e, hosi parte fízika hodi habelar kualidade vida moris no bein-estar komunidade Oé-Cusse Ambeno.

“Iha V Governu Konstitusionál ho Primeiru Ministru Xanana Gusmão, aprova planu estratéjiku dezenvolvimentu nasionál, iha mumentu aprovasaun rasik, ha’u haruka textu ida ba maun Xanana, ha’u husu nia, ita-boot aprova planu ne’e halo saida, sei ita serbisu la hatene ho planu, entaun nia kaer ida-ne’e, dezafia fali ha’u, entaun nia husu ha’u atu implementa parte ba planu, atu lidera zona ekonómia sosiál ne’e,” Alkatiri ko’alia iha ámbitu selebrasaun aniversáriu RAEOA-ZEEM iha otél Ambeno Oé-Cusse.

Nia afirma, zona ekonomia espesiál normalmente tendénsia iha setór indústria komérsiu no setór seluk, tan-ne’e hakarak dezafia nia-aan rasik, tanba iha ona previzaun katak modelu dezenvolvimentu rua domina ona iha mundu sei mihis ba beibeik tanba la serbí.

“Entaun, maun Xanana husu ha’u dehan, ita-boot hakarak halo saida, ha’u hakarak mai ho konseitu foun ekonomia sosiál merkadu, balun dehan ne’e barak ona iha mundu, ha’u dehan lae, ne’e sei la hanesan, maibé ida-ne’e halo kapasidade join modelu rua iha parte pozitiva maibé mai ho prinsípiu ida, ba sustentabilidade iha dezenvolvimentu,” nia katak.

“Mumentu ne’ebá Maun Xanana husu ha’u atu halo iha-ne’ebé, ha’u dehan persiza rai ida izoladu, iha Timor-Leste rua de’it, Atauro maibé ki’ik demais, entaun ha’u hakarak ba Oé-Cusse, antes ema barak la serbisu tanba sira-nia servisu la satisfaz, kuandu rezultadu satisfaz persiza muda sira-nia vida ekonómia iha serbisu hotu, entaun Oé-Cusse hahú uluk liga ba Atauro hanesan polu komplementár ho atributu seluk,” nia afirma.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here