Prezidente Repúblika, José Ramos Horta, akompaña Reprezentante Espesiál Prezidente Repúblika no Timor-Leste, Xanana Gusmão, dezloka ba rai-liur hodi aprezenta prezervasaun biodiversidade Timor-Leste iha fórum Oseanu nivél mundiál ne’ebé sei hala’o iha Portugál (27 juñu to’o 01 jullu 2022). Imajen Tatoli/Nelson de Sousa.

DILI, 17 juñu 2022 (TATOLI)—Reprezentante Espesiál Prezidente Repúblika no Timor-Leste nian, Xanana Gusmão, sei aprezenta prezervasaun biodiversidade Timor-Leste iha Fórum Oceano nivél mundiál ne’ebé organiza hosi Organizasaun Nasaun Unida, ne’ebé sei hala’o iha Portugál iha 27 juñu to’o 01 jullu 2022.

Prezidente Repúblika, José Ramos Horta, akompaña Reprezentante Espesiál Prezidente Repúblika no Timor-Leste, Xanana Gusmão. Imajen Tatoli/Nelson de Sousa.

“Objetivu partisipa iha fórum ne’e atu ko’alia kona-ba prezervasaun biodiversidade nivél mundiál. Nu’udar reprezentante Estadu Timor-Leste sei aprezenta mós Timor-Leste ninia prezervasaun biodiversidade, liu-liu iha parte kosta súl hanesan to’o ba iha Illa Jaco, Ataúro hodi dezenvolve área turistika bele dada turista mai Timor-Leste,” Xanana Gusmão hateten ba jornalista sira iha aeroportu internasionál Nicolau Lobato Comoro, Dili, hafoin atu dezloka ba rai-li’ur ho aviaun Air Asia, sesta ne’e.

Fórum altu nivél ne’e, sei partispa hosi nasaun lubuk no sei ko’alia mós kona-ba dezafiu no solusaun sira sei mai oinsá proteje no prezerva biodiversidade.

Prezidente Repúblika, José Ramos Horta, hateten nia-parte labele partisipa direta ba konvite iha fórum mundiál refere no ajenda sira seluk, tanba foin simu pose nune’e delega de’it Xanana Gusmão hodi partisipa tanba Xanana Gusmão iha koñesimentu di’ak ba área hirak ne’e.

“Razaun primeiru, ha’u foin mak simu pose kompleta fulan ida hodi fó prioriedade absoluta organizasaun iha prezidensia para iha instituisaun ida forte. Segundu, situasaun polítika interna. No, área ne’ebé importante Xanana Gusmão bele halo nu’udar lidér nasionál no lidér mundiál reprezenta Timor-Leste ho autoridade no kompeténsia iha reuniaun boot iha Bruxelas, Uniaun Europeia nian kona-ba dezenvolvimentu. Nia sei liu ba Inglaterra reuniaun seluk kona-ba fronteira terrestre no máritima. Hafoin ne’e sei liu ba Portugál ho Queina ne’e sei organiza simeira Oseanu ONU nian, área ne’e mós Xanana domina,” Horta hateten.

Tanba ne’e, Xefe Estadu delega hodi husu Xanana reprezenta lori Estadu tomak nia naran hodi partisipa fórum internasionál refere.

Entertantu, tuir ajenda Xanana sei partisipa Forum Loron Dezenvolvimentu Uniaun Europeia (UE) 2022 nian hosi 18–22 juñu iha Bruxelas.

Hafoin iha Bruxelas, Xanana Gusmão nu’udar Xefe Negosiadór ba Fronteira Marítima sei hala’o fali viajen ba Londres hodi hala’o reuniaun estratéjika ho Konsellu Jurídiku sira kona-ba negosiasaun fronteira rai no tasi nian, ne’ebé sei ko’alia liu-liu ho kestaun tékniku jurídiku hodi aselera prosesu negosiasaun fronteira terrestre entre Timor-Leste ho Indonézia ne’ebé daudaun ne’e seidauk iha solusaun.

Hafoin hosi Londres, Xanana sei hala’o fali nia viajen ba Lisboa hodi lidera delegasaun Timor-Leste nian ba konferénsia Oceano ne’ebé ONU mak organiza, ne’ebé sei hahú hosi 27 juñu–01 jullu 2022, hanesan Reprezentante Espesiál Prezidente Repúblika nian no Timor-Leste nia Reprezentante Espesiál ba Ekonómia Azul.

Xanana Gusmão ho ekipa sei hala’o mós atividade sira-ne’ebé g7+ mak organiza nu’udar Pesoa Eminente g7+ nian.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here