Jerente Programa TOMAK iha Baucau, Isaac Ribeiro Ximenes. Imajen Tatoli/Natalino Belo.

BAUCAU, 17 juñu 2022 (TATOLI) – Organizasaun To’os ba Moris Diak (TOMAK) implementa programa agrikultura sensivel no agrikultura komersiál iha munisípiu Baucau, maibé kestaun infraestrutura bázika hanesan estrada no irrigasaun mak impede atu hasa’e produsaun.

Jerente programa TOMAK iha munisípiu Baucau, Isaac Ribeiro Ximenes, hateten, programa ne’e kobre iha postu administrativu neen no suku 41 ne’ebé hala’o atividade rua hanesan agrikultura sensivel ba nutrisaun no agrikultura komersiál maibé tanba kondisaun infraestrutura hanesan estrada difikulta kolektór no to’os na’in sira atu transporta produtu ba merkadu.

“Estrada sai difikuldade ba to’os no sosa na’in sira atu lori sira-nia produtu to’o iha vila ka ba Dili,” Jerente Programa TOMAK iha Baucau informa ba Tatoli iha Vila Nova, sesta ne’e.

Nune’e mós irrigasaun sai fatór importante tanba dalaruma to’os na’in sira atu asesu ba kanál irrigasaun maibé hetan estragu hosi dezastre naturál entaun fó impaktu ba produsaun.

TOMAK implementa atividade agrikultura sensivel ba nutrisaun kona-ba promove ai-han nutritivu sira, halibur grupu agrikultura no promovu tékniku foun hodi asesu ba ai-han, halo kaneiru hanesan kuda modo no ai-han nutritivu, rai no empresta osan hodi utiliza ba nesesidade uma-laran.

Agrikultura komersiál mak kuda hahan prinsipál ne’ebé poténsia iha merkadu hanesan fore-rai, lís-mean no hare-mean tanba valór ekonómika iha merkadu.

“Ita promove tékniku foun hanesan lís musan tanba kustu menus, kustu ladún karun, bele poupa osan no bee oituan bele ona hasa’e produsaun,” Isaac Libeiro Ximenes akresenta.

TOMAK utiliza sistema farmer field day no farmer field school hanesan kria to’os ezemplár ba agrikultór sira inklui serbisu hamutuk ho agrikultór munisípiu liuhosi estensionista sira hodi fó koñesementu kona-ba prátika agrikultura ne’ebé di’ak hanesan fila-rai, selesaun fini no kuda to’o kolleta.

TOMAK kobre atividade refere iha postu administrativu Venilale, Vemasse, Laga, Baguia no Baucau vila hanesan iha suku Uma-ana iku, Baduho’o, Uailaha, Gariuai, Triloka, Bucoli, Ostiku, Loilubu, Uatulari, Caicua, Vemasse tasi, Uaegae, Buruma, Samalari, Teknomata, Larisura, Lawateri no seluk tan.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here