Operadór Telekomunikasaun Telemor fó apoiu nesesidade bázika ba membru Asosiasaun Halibur Defisiénsia Matan Timor-Leste (AHDMTL). Imajen Tatoli/osória Marques.

DILI, 17 juñu 2022 (TATOLI)—Operadór Telekomunikasaun Telemor ho ekipa Saúde ba Ema Hotu (SABEH), sesta ne’e, fó apoiu nesesidade bázika no halo tratamentu saúde ba membru Asosiasaun Halibur Defisiénsia Matan Timor-Leste (AHDMTL) iha ofisina AHDMTL, Manleuana, Dili.

Membru Asosiasaun Halibur Defisiénsia Matan Timor-Leste (AHDMTL). Imajen Tatoli/osória Marques.

“Ohin ami hosi telemor hamutuk ho ekipa SABEH fó apoiu nesesidade bázika hanesan foos saku 10 no supermie dos 10 ba ita-nia ema ho defisiénsia matan iha ne’e, inklui fó tratamentu saúde ba ema ho defisiénsia sira,” Vise Diretór Jerál Telemor, Pham Van Manh, hateten ba jornalista sira, iha Maleuana, sesta ne’e.

Nia dehan, apoiu ida-ne’e hahú ho Asosiasaun Halibur Defisiénsia Matan Timor-Leste (AHDMTL) depois semana oin sei fornese tan ba Fundasaun Ahisaun no orfanatu sira iha Dili laran no mós orfanatu ida iha Maubara.

“Ami-nia objetivu apoiu nesesidade bázika ne’e tanba ha’u mai haree dezáfiu barak ne’ebé ema ho defisiénsia sira enfrenta no ida-ne’e sai hanesan apoiu dahuluk maibé iha futuru sei hadi’ak liután,” nia dehan.

Telemor la’ós de’it área komersiál maibé Telemor mós oinsá hakbesik an ba bens estar sosiedade sira-nian, liu-liu ba ema ho defisiénsia sira.

Entretantu, Grasiela da Silva Pereira, hateten ema ho defisiénsia matan ne’ebé ohin mai halo tratamentu ne’e hamutuk 91.

“Ohin simu ema ho defisiénsia matan hamutuk 91 mak konsulta no hosi númeru ne’e na’in lima simu vasina COVID-19 nian. No ohin ami haree no konsulta ne’e barak liu moras kronika sira hanesan grastritis ne’ebé mak aas no ISPA,” nia esplika.

Diretór Interinu AHDMTL, Gabriel de Sousa, agradese ba ekipa SABEH ho Telemor ne’ebé fó apoiu no fó konsulta ba sira.

“Ami hosi AHDMTL agradese ba SABEH ho Telemor tanba bele apoiu ona ami ho buat ne’ebé kiikoan maibé oferese fuan ho laran ne’e importante tebes ba ami,” nia agradese.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here