Xefe Departamentu Relasaun Públika Komandu Jerál Polisia Nasionál Timor-Leste, Superintendente Xefe Armando Monteiro, Imajen Tatoli/Natalino Costa

DILI, 17 juñu 2022 (TATOLI)—Polísia Nasionál Timor-Leste (PNTL) liuhosi Polísia Nasionál Servisu Investigasaun Kriminál (PNSIK) no Polísia Federál Austrália (AFP, sigla Inglés), detein mane ida, sidadaun Austrália ho inisiál RFT tanba suspeitu ba kazu abuzu seksuál hasoru minoridade no tráfiku umanu.

PNSIK no AFP, kinta ne’e, ezekuta buska domisiliáriu no apreensaun  ba supeitu iha nia rezidénsia Marconi, suku kampu Alór, postu administrativu Dom-Aleixo, munisípiu Dili.

“Ekipa PNSIK hamutuk Polisia Federál Austrália halo detensaun ba autór ne’e iha nia hela fatin tanba hetan denúnsia hosi família vítima rasik iha Austrália katak suspeitu halo aktu ne’e dala barak ona hasoru labarik minoridade sira inklui envolve atividade tráfiku umanu,” Portavós Komandu Jerál PNTL, Superintendente Xefe Armando Monteiro, hateten ba jornalista sira liuhosi konferénsia imprensa ne’ebé halo iha Komandu Jerál Caicoli-Dili, sesta ne’e.

Prosesu investigasaun no ezaminasun ba kazu ne’e halo hosi PNTL ho AFP liuhosi TLPDP iha Timór-Leste. Nune’e ekipa FORENSIK sei iha hela tereñu halo  ezaminasaun ba suspeitu nia hela fatin ne’ebé bain-bain uza hodi prátika abuzu seksuál hasoru minoridade sira.

“Ha’u seidauk ko’alia buat ruma tanba kazu ne’e sei iha hela prosesu investigasaun nia-laran. Maibé vítima PNTL asegura ona,” nia afirma.

PNTL mós rekolla informasaun balun katak supeitu ne’e la serbisu, maibé hanesan sidadaun Austrália bain-bain no mai iha Timor-Leste iha tinan 2016 no konsege kaben ho timór-oan ida,

Nune’e, Armando Monteiro husu ba sidadaun sira ne’ebé sai vítima ba suspeitu nia hahalok ne’e atu hatoo keixa ba PNSIK, nune’e bele haforsa tan evidénsia.

“Lalika moe no subar an, mai iha PNSIK hato’o keixa atu ita bele dezenvolve evidénsia sira no bele haforsa faktu sira hodi supeitu bele responsabiliza nian aktu ne’ebé nia komete,” nia sujere

Journalist   : Natalino Costa

Editór           :  Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here