Ministru Ensinu Superior Siénsia no Kultura, Longuinhos dos Santos. Imajen Tatoli/Egas Cristóvão

DILI, 17 juñu 2022 (TATOLI)–Ministru Ensinu Superior Siensia no Kultura (MESSK), Longuinhos dos Santos, fó pareser hodi haruka fila proposta kréditu Universidade da Paz (UNPAZ) no Institutu Superiór Cristal (ISC) nian tanba iha fallansu tékniku.

“Ita haree iha buat balun la prienxe kritériu, tanba ne’e maka ita rasik fó pareser negativu ba proposta UNPAZ no ISC nian hodi haruka filafali ba sira,” Ministru relata ba Agência Tatoli, iha edifísiu MESSK Colmera, sesta ne’e.

Nia esplika, ministériu simu dokumentu liña kréditu UNPAZ nian hosi Banku Nasionál Komérsiu Timor-Leste (BNCTL), hafoin maka atu husu pareser tanba iha buat balun la tuir dekretu-lei ne’ebé mak vigora, tanba ne’e ministériu fó pareser.

“Ita labele fó hatene ba sira tanba ita atu hapara sira ne’e bazeia ba informasaun ne’ebé mak ita simu hosi banku. Tanba sira (banku) haruka karta no dokumentu mai ita tuir dekretu-lei, entaun tenke hetan pareser hosi ita,” nia tenik.

Notísia relevante: UNPAZ seidauk asesu liña kréditu ba ‘Ensinu Superiór Kualidade Plus’

Aleinde ne’e, ISC ninia proposta hateten atu halo dezenvolvimentu ba ensinu sekundáriu, maibé loloos kréditu fó de’it ba ensinu superiór, tanba ne’e MESSK haruka hadi’a filafali proposta.

Iha fatin ketak, Reitór UNPAZ, Adolmando Amaral, la kontente ho desizaun MESSK tanba halo karta ba banku maibé la fó koñesimentu ba universidade,

“Derrepente de’it rejeita ona ami-nia proposta atu asesu ba kréditu. Ami ho banku laiha problema ha’u la hatene loos Ministru ida-ne’e ninia hakarak saida, ha’u la komprende. Ami ba konfirma ho banku sira dehan ami-nia proposta laiha problema. BNCTL rasik dehan katak hein hela proposta UNPAZ nian no iha futuru hakarak mai direita ka tuir fali liña kréditu kualidade+ ne’e mós laiha problema, sira prontu atende nafatin proposta,” nia dehan.

Adolmando dehan, karta ne’e hetan hosi banku ninia konteúdu maka rejeita proposta UNPAZ, tanba ne’e UNPAZ husu hela klarifikasaun ministru kona-ba pareser negativu ne’ebé nia fó ba universidade maibé ministru seidauk responde.

Nune’e mós, Reitór ISC, Sebastião Pereira, hateten, pareser ne’ebé sira simu hosi MESSK kona-ba fallansu tékniku, sira sei hadi’a no submete fali ba banku

“Ami hadi’a hotu ona no haruka fali ona ba banku foin lalais ne’e,” nia dehan.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here