Ministru Agrikultura no Peska, Pedro dos Reis. Imajen Tatoli/Francisco Sony

DILI, 17 juñu 2022 (TATOLI)—Ministériu Agrikultura no Peska (MAP) liuhosi Diresaun Nasionál Veterinária, sesta ne’e, halo lansamentu ba laboratóriu diagnóstiku veterinária, ne’ebé ho apoiu fundu hosi Governu Austrália.

Ministru Agrikultura no Peska, Pedro dos Reis, konsidera, laboratóriu ne’e importante tebes ba Timor-Leste tanba ba oin sei halo diagnóstiku ba moras relevante animál nian.

“Inaugurasaun ne’e nu’udar susesu ida ba MAP tanba bele fasilita liután servisu tékniku sira nian ba futuru,” Ministru hateten iha laboráriu diognóstiku veterinária, Caicoli.

Notísia relevante: MAP no MDF Austrália reativa kampaña nasionál sensibilizasaun ASF

Timor-Leste presiza laboratóriu diagnóstiku tanba moras animál hanesan African Swine Fever (ASF) grave tebes iha tinan 2019, afeta ba komunidade nia animál fahi kuaze 1.150 mak mate.

“Momentu ne’ebá ita laiha laboratóriu di’ak no ita sempre lori amostra ba halo teste iha Indonézia no Austrália. MAP kontente bele hetan suporta hosi Emabaixadór harii laboratóriu, nune’e bainhira halo teste ruma la presiza ona lori ba rai-li’ur,” nia akresenta.

Ministru lori Governu nia naran, husu nafatin Governu Austrália nia apoiu nu’udar nasaun viziñu iha área oioin hodi lori dezenvolvimentu ba oin.

“Ha’u husu ba tékniku no diresaun nasionál jerál hotu, fasilidade ne’ebé apoiu hosi ita-nia parseiru sira uza ho kuidadu nune’e bele uza ho dura,” governante ne’e hameno.

Iha biban hanesan, Diretór Jerál Pekuária no Veterinária MAP, Domingos Soares, konsidera inisiativa ne’e importante ba MAP tanba laboratóriu ne’e ho teknolojia avansadu ne’ebé bele fasilita deteta moras animál.

“Ha’u agradese ba Governu Austrália ho donatór sira seluk ne’ebé fó ona finansiamentu ba estabelesimentu laboratóriu ida-ne’e, atu nune’e ita dezenvolve ita-nia rai ho di’ak,” nia dehan.

Iha fatin hanesan, Embaixadór Austrália iha Timor-Leste, Bill Costelo, hateten, susesu ne’ebé ohin loron selebra hanesan esforsu ne’ebé durante ne’e la’o hela, hanesan atividade ne’ebé Governu Austrália suporta liuhosi programa TOMAK.

“Ha’u kontente tebes tanba Austrália bele ajuda Timor-Leste liuhosi programa agrikultura, liga ba oinsá Timor-Leste responde ba moras African Swine Fever nia programa ida-ne’e ho totál milliaun AU$1,3,” nia informa.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here