Diretór Delegasaun PNDS munisípiu Viqueque, Higinio P. Z e Silva. Imajen Tatoli/Vitorino Lopes da Costa

VIQUEQUE, 17 juñu 2022 (TATOLI)—Diretór Delegasaun Programa Nasionál Dezenvolvimentu Suku (PNDS) munisípiu Viqueque,  Higinio P. Z e Silva, hateten, durante prosesu konstrusaun Uma Kbiit Laek (UKL) iha munisípiu Viqueque hasoru dezafiu klima no asesu estrada.

“Kondisaun hirak ne’e difikulta fornesedór sira hatama materiál konstrusaun uma, tanba ne’e prosesu konstrusaun to’o agora seidauk atinje pursentu boot, maibé serbisu kontinua la’o hodi atinje 100%,” Diretór informa ba Agência Tatoli, iha munisípiu, sesta ne’e.

Difikuldade seluk ne’ebé fornesedór sira enfrenta maka folin materiál, tanba foin lalais presu materiál kuaze sa’e.

“Entaun afeta mós ba empreza sira-nia kapasidade, iha inísiu sira tuir prosesu aprovizionamentu presu ketak, hafoin fulan hirak tuir mai derrepente presu materiál sa’e hotu, ida-ne’e hanesan obstákulu boot.  Ho difikuldade sira-ne’e maka ita sempre tarde,” nia relata.

Aleinde ne’e, progresu konstrusaun UKL iha munisípiu Viqueque hamutuk unidade 108 daudaun atinje 70%.

“Kona-ba progresu konstrusaun UKL iha munisípiu Viqueque ita daudaun atinje ona 70%.  Iha postu Viqueque vila maka halo ona inaugurasaun, maibé iha postu seluk daudaun besik finaliza ona,” nia akresenta.

Notísia relevante: Progresu konstrusaun UKL Viqueque atinje 70%

Nune’e mós, antes ne’e iha suku Bibileo, postu Viqueque inaugura UKL ona no entrega ona ba benifisiáriu no fulan ida-ne’e sei inagura tan UKL iha suku Builale, postu Ossu.

Daudaun ne’e, progresu kontrusaun UKL iha postu Viqueque vila atinje ona 85%, Ossu atinje ona 54%, Uatulari 41%, Uatucarbau 55% no Lacluta 57,55%.

Jornalista : Vitorino Lopes da Costa

Editora     :  Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here