Ida ne'e mak kondisaun ESG numeru 1 Lautem ne’ebé estudante sira tuur iha bee-laran hodi simu matéria hosi profesór sira. Imajen/espesiál

DILI, 17 Juñu 2022 (TATOLI)—Eskola Sekundáriu Jerál (ESG, sigla portugés) númeru 1 Lautém ne’ebé lokaliza iha aldeia Lautém, suku Parlamentu, postu administrativu Lautém, munisípiu Lautem, ho kondisaun ne’ebé difikulta prosesu aprendijazen iha tempu udan.

Prezidente Konsellu Estudante ESG númeru 1 Lautém, Gloriano Epifanio Pereira, sente triste tebes tanba kondisaun edifísiu eskola aat difikulta estudante sira tenke lakon matéria no ladun aprende tanba tempu udan sala aula sira nakonu ho bee no tahu.

Kondisaun Jeral ESG numeru 1 Lautem. Imajen/espesial.

“Ami sente triste tebes tanba hala’o hela prosesu aprendijazen mak udan-monu rai ne’e prejudika ami nia aula, tanba kondisaun eskola ne’ebé laiha janela no odamatan, eskola hanesan fali tenda ida ne’ebé udan mai hodi bee nalihun iha laran, tahu nakonu no mós kadeira sira bokon hotu, halo ami tenke para aula hodi fila ba uma,” Prezidente Konsellu Estudante ne’e hateten ba Agência TATOLI liuhosi telefónika, sesta ne’e.

Ho kondisaun ne’e, nia parte husu ba Governu hodi tau matan ba eskola ne’e, tanba durante tinan barak laiha re-abilitasaun ruma ba eskola ne’e.

“Ami husu ba parte Governu hodi bele mai haree ami nia eskola ne’e hodi hadia, nune’e ami bele tuur iha fatin seguru hodi simu matéria. Tanba iha fatin seluk kolega sira tuur ho kontete simu matéria, maibé ami ne’e hanesan fali tuur iha fahi-luhan hodi simu matéria”, nia sujere.

Iha biban ne’e, estudante Alexandrina dos Santos Conceição Silva, mós sente trsite tanba kondisaun eskola ne’e la garante estudante sira sai kualidade, nune’e Governu tenke hadi’a no kompleta fasilidade atu sai fatin seguru ba estudante sira aprende.

“Ami mos hakarak aprende hanesan ho kolega sira seluk ne’ebé iha eskola kondisaun di’ak, tuur iha mahon laran hodi simu matéria,” nia halerik.

Nia hatutan: “Ami nia biblioteka mós iha maibé kuandu udan ami nia livru sira bokon hotu no bainhira udan para ami hamutuk ho professór sira habai fali mak foin bele lee, se lae dodok hotu no ami so’e”.

Entretantu, Diretór Eskola ESG Númeru 1 Lautém, Jeri Freitas, mós preokupa kondisaun uma no aula ba estudante sira hodi tuir prosesu aprendijazen la seguru tanba uma nia plafon, odamatan no janela laiha atu satan udan been no anin.

“Ami iha aula hitu mak daudaun ne’e estudante sira uza hodi tuir prosesu aprendijazen, kada sala ida estudante hamutk 30-resin, tanba ami fahe estudante ba turnu rua, dader no loron-kraik, estudante ne’ebé eskola dader mak Siénsia Sosiál no Siénsia Naturál hosi klase 3 no klase 2 no estudante sira ne’ebé aula lokoraik mak estudante hosi  klase 1 no klase 2″, nia afirma.

Ho kondisaun eskola ne’e, Diretór ne’e dehan, durante ne’e inan-aman estudante sira maka kontribui osan ba kada períodu hodi hola materiál balun atu satan udan-been no selu mós ba Profesór voluntáriu nain-neen inklui pesoál seguransa ida.

“Inan-aman sira tau osan no sira rasik maka ajuda hodi taka kalen atu nia oan sira mai tuur iha laran hodi eskola. Inan-aman sira mós kontribui osan ho montante $3 hodi selu professór no seguransa na’in-ida ho saláriu kada fulan $150,” nia afirma.

Maski, nia dehan iha tinan 2019 hatama ona proposta ba iha Edukasaun Munisípiu Lautém, maibé too agora sidauk iha resposta. Iha tinan 2019 mós Ministériu Edukasaun Juventude Desportu (MEJD) no UNICEF mai haree ona no estudu hodi sukat, maibé nafatin sidauk iha resposta.

Jornalista  : Natalino Costa

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here