Polísia Eskuadra Cailaco rekolla hela dadus matebian Elizito Carvaleira dos Reis, ne'ebe mate tara-an iha ninia kuartu laran. Imajen Tatoli/Sérgio da Cruz.

BOBONARO, 17 juñu 2022 (TATOLI) – Joven ida ho naran Elizito Carvaleira Reis tinan 20, hosi bairru Cruz, aldeia Berleu, suku Meligo, postu administratrivu Cailaco, munisípiu Bobonaro, sesta ne’e deside hakotu nia vida liuhosi dalan tara-aan iha nia kuartu laran.

Akontesimentu ne’e akontese iha tuku 08:00 dadeersan, vítima isin molik tau kalsa badak kór malahuk, tara-an ho kondisaun tali ‘karau’ nian aperta hela iha kakorok inklui kadeira ai ida mós besik nia monu fatin.

Rodrigo dos Reis nu’udar aman hosi matebian, haktuir dezde loron-kinta ne’e no horikalan, nia sei di’ak hela no ohin dadeersan ne’e mos matebian sei prepara hela sasán atu ba kesi karau iha área Bilimau.

Tanba tuir planu aban, loron-sábadu, família sira atu ba tesi-lia hodi husu ninia namorada ne’ebé nia aprezenta ba família atu forma uma-kain.

“Depois nia kleur-kleur tama iha laran, ha’u tuku odomatan dehan, amaun, amaun, o halo saida hela, o ba ona ka, nia la hatán, entaun ha’u tebe odomatan pregu ne’e sai tiha, ha’u tama ba haree tali metin tiha iha kakorok, maibé kaben sei iha, sente ís sei iha oituan, ha’u tanis tebe kadeira ne’e atu hasai tali ne’e ami rua monu hotu, maibé nia ís laiha tiha ona,” nia informa ba Tatoli, iha fatin akontesimentu.

Nia subliña, matebian tuir-malu ho nia namorada patraun ida iha Maliana nia oan feto, durante tinan lima ona no antes ne’e  konsege iha problema oituan tanba feto ne’e deside atu ba eskola iha Indonézia, maibé matebian la aseita no lees hotu ninia namorada nia dukumentu, ho ida-ne’e mak família parte rua mós bolu malu rezolve didi’ak ho ulun malirin.

Hafoin kazu ne’e akontese, liu menutu balun de’it tanba rona família sira tanis hakilar pesoál saúde inklui Polísia Nasionál Timor-Leste (PNTL) munisípiu Bobonaro hosi eskuadra Cailaco to’o kedas vítima nia uma hodi rekolla informasaun no evidénsia kona-bá motivu loloos hosi kazu tara-aan ne’e.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here