Servisu Saúde Munisípiu Covalima, Maria Fatima Moniz. Imajen Tatoli/Celestina Teles.

COVALIMA, 17 juñu 2022 (TATOLI)–Diretora Servisu Saúde Covalima, Maria de Fatima Moniz, hateten Governu estabelese ona sentru saúde hitu (7) no postu saúde 24 iha munisípiu Covalima maibé sei menus rekursu umanu hanesan menus parteira no médiku. .

Nia hateten, postu saúde ne’ebé estabelese ona iha Covalima hamutuk 24 no konstrui ona rezidénsia ba médiku sira hanesan iha postu saúde Fatuleto, Lepo no Wetaba.

“Postu saúde ne’ebé mak ita estabelese iha munisípiu Covalima hamutuk 24 maibé sei menus rekursu umanu. Iha tinan 2019, ita hetan orsamentu hosi munisípiu Covalima konstrui ona rezidénsia postu saúde Fatuleto, Lepo no Wetaba, agora ita uza hodi halo atendimentu ba komunidade,” Maria de Fatima Moniz, hato’o ba Agência Tatoli iha nia kna’ar fatin.

Tuir planu, iha tinan 2022 ne’e planu no dezeñu Planta no Kadernu Enkargu (BoQ) munisípiu Covalima prevee orsamentu atu konstrui rezidénsia ba médiku sira liuhosi Planu Integradu Dezenvolvimentu Munisipal (PIDM) sei konstrui rezidénsia iha postu administrativu Fatumea iha aldeia Alastehen, postu Fohorem iha suku Dato-tolu, postu Suai Vila iha suku Suai-loro. 

Bazea ba dadus, hosi postu saúde iha Covalima hamutuk 24 ne’e iha postu saúde neen (6) mak seidauk iha médiku mak hanesan postu saúde Foho lulik, Lalawa, Gala, Caicoli, Belaku no Kulu-oan.

Enkuantu postu saúde ne’ebé seidauk iha parteira mak hanesan Bulu, Fatuleto, Caicoli, Belaku no Kulu-aon, postu saúde Alastehen ho Nanu no seluk tan, maibé servisu saúde rasik buka meiu jere nia rekursu hodi destaka parteira no médiku sira iha postu saúde hirak ne’e.

“Maske ho problema hirak ne’e, ami bele jere ami-nia rekursu iha sentru saúde hodi halo oráriu  ba parteira no médiku ne’ebé iha sentru saúde destaka ba postu saúde hodi halo atendimentu iha postu saúde sira-ne’ebé laiha parteira no médiku,” nia dehan.

Tanba, nia dehan, servisu saúde halo koordenasaun di’ak kada fulan-tolu sempre halo monitorizasaun ba ekipamentu bainhira laiha sempre haruka pedidu ba nasionál.

“Kona-ba koordenasaun ami iha koordenasaun ne’ebé di’ak kada fulan tolu ami sempre halo monitorizasaun halo supervizaun, bainhira laiha ekipamentu ami halo pedidu. Ita hato’o agradese tanba iha tinan hirak liuba apoiu hosi WHO fó apoiu ekipamentu iha postu saúde no sentru saúde sira sufisiente. Maibé, menus iha rekursu umanu,” nia hateten.

Jornalista : Celestina Teles

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here