ANLA.IP fó kapasitasaun ba empreza lokál sira kona-ba trata dokumentu ambientál, iha salaun edukasaun munisipál. Imajen Tatoli/Vitorino Lopes da Costa

VIQUEQUE, 17 juñu 2022 (TATOLI)–Ekipa hosi Autoridade Nasionál Lisensa Ambientál, Institutu Públiku (ANLA, I.P), sesta ne’e, fó kapasitasaun ba empreza lokál sira iha munisípiu Viqueque kona-ba prosesu trata dokumentu lisensa ambientál.

“Ohin ami fó kapasitasaun ba empreza sira kona-ba prosesu lisensa ambietál bazeia ba dekretu-lei númeru 05/2011, ne’ebé hateten katak kualker atividade projetu tantu públiku no privadu presiza iha lisensa ambientál molok implementasaun projetu,” Sekretáriu Ezekutivu ANLA, I.P, Antonio Lelo Tasi, hateten, ba Agência Tatoli iha salaun edukasaun munisipál, Beloi.

Projetu privadu maka hanesan empreza lokál sira ne’ebé loke ofisina, restaurante, karpintaria, otelária, enkuantu projetu públiku irrigasaun na’in mak Ministériu Agrikultura no Peska (MAP), ponte no estrada na’in maka Ministériu Obra Públika (MOP).

“Diseminasaun informasaun ba komunidade sira importante, nune’e labele difikulta ba ita-nia komunidade bainhira mosu impaktu ruma. Lisensa ambientál iha klasifikasaun tolu hanesan kategória A, B no C,” nia akresenta.

Notísia relevante: Empreza 35 simu setifikadu lisensa ambientál hosi SEA

Atu identifika klasifikasaun ne’e, na’in ba projetu aprezenta dokumentu ba ANLA, I.P ne’ebé deskreve lokalizasaun, tipu projetu, no eskala projetu.

“Ita define klasifikasaun ba kategória A, signifika grande projetu ho ninia prosesu sei liuhosi estudu ne’ebé envolve sientífiku, haree mós aspetu tékniku, aspeitu sosiál no kulturál. Kategória B maka hanesan projetu reabilitasaun estrada sira, ezemplu estrada hosi Baucau to’o Viqueque no kategoria C maka restaurante, ofisina, karpinteru no otélaria,” nia esplika.

Nia dehan, empreza sira ne’ebé la trata dokumentu lisensa ambientál sei difikulta empreza bainhira iha implementasaun projetu, tanba ne’e ANLA, I.P halo notifikasaun ba empreza no sira ne’ebé laiha lisensa, sei suspende atividade hodi fó biban ba sira trata lisensa ambientál.

“Ami tenki ezije sira trata lisensa ambientál hodi bele identifika eskala projetu, atu haree bainhira projetu ne’e implementa, ninia impaktu ba komunidade maka saida. Ho ida-ne’e projetu na’in sira bele tau iha empreza sira-nia planu jestaun ambientál hodi bele jere planu sira atu labele fó impaktu ba komunidade,” nia tenik.

Durante  estabelese ANLA, I.P iha tinan 2019 to’o agora, rejista ona empreza hamutuk 1.000 resin no empreza sira ne’ebé hetan ona lisensa ambientál hamutuk 700 resin, nune’e kada tinan ANLA, I.P prodús lisensa ambientál hamutuk 150 resin.

Aleinde ne’e empreza lokál sira iha munisípiu Viqueque hakbesik ba ANLA, I.P hodi trata lisensa tanba laiha lisensa sei difikulta ba empreza sira-nia atividade iha futuru.

“Iha oportunidade ida-ne’e, daudaun ANLA, I.P prosesa hela lisensa ambientál gratuita, maibé iha tempu badak ami-nia dekreitu-lei ida kona-ba taxa ambientál aprova ne’e hahú ona selu. Tanba ne’e, ha’u husu komunidade Viqueque atu aproveita rejista lisensa,” nia hato’o.

Atividade kapasitasaun ne’e partisipa hosi Administradór munisípiu Viqueque, Januário Soares ‘Bolly’, Diretór munisipál, Diretór empreza, Autoridade lokál no estudante sekundáriu sira.

Jornalista : Vitorino Lopes da Costa

Editóra     :  Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here