Ilustrasaun Infesaun Respiratóriu Aguda. Imajen/Espesiál.

ERMERA, 16 junu 2022 (TATOLI)—Xefe Sentru Saúde Hatulia, José Ximenes Martins, informa hahú iha fulan junu 2022 ne’e, Sentru Saúde Hatulia rejista moras Infesaun Vias Respirátoriu Aguda (IRA/ISPA) aas liu to’o atinje 70%.

“Iha Postu Saúde Leimea Craic iha fulan junu ne’e, ami haree katak iha semana rua nia laran moras IRA sa’e makaas atinje 70%,” José Ximenes Martins, hateten ba jornalista sira, iha Sentru Saúde Hatulia, Leimea Craic, kinta ne’e.

Moras IRA ne’e akontese maioria labarik no adultu sira, tanba tempu udan iha suku ne’e anin boot no klíma la di’ak.

“Nia kauza hosi moras IRA mak, tanba anin boot, klíma no seluk. Alende ne’e, populasaun ba asesu natar, entaun kauza hosi ne’ebá mak hamosu IRA,” nia dehan.

Ho moras ne’e, Sentru Saúde Hatulia halo prevensaun uza métodu eventu kalan hato’o informasaun no halo promosaun saúde tanba iha tempu kalan mak populasaun konsentra iha sira-ida-idak nia uma.

“Nune’e ne’e mós, ami ba halo atividade iha aldeia sira kona-ba molok halo tratamentu ami halo promosaun uluk, hafoin halo tratamentu,” nia esplika.

Aleinde moras IRA, nia informa, Sentru Saúde Hatulia mós rejista moras isin katar tanba populasaun barak iha ne’e halo natar, hosi ne’e sira fila hosi natar ba haris iha mota bee merak mak provoka isin katar.

Entretantu, pesoál saúde iha Sentru Saúde Hatulia, daudaun ne’e hamutuk 33 ne’ebé kompostu hosi mediku na’in ualu (8), enfermeira neen (6), parteira tolu (3), aleadu hitu (7), motorista ida (1), farmasia tolu (3), analista ida (1), administrasaun ida (1) no asisten infermeiru na’in-tolu (3).

Moras Infesaun Vias Respiratória Aguda (IRA)

Moras infesaun Vias Respiratóriu Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis nian. Bainhira ita dada iis anin sei halai tuir ita-nia dalan iis nian antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortavél bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bakteria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan Rhinovirus, Coronavirus, Virus parainfluenza, no adenovirus.

Fatór sira-ne’ebé kontribui hetan moras IRA

Fatór sira-ne’ebé kontribui atu hetan moras IRA mak hanesan (1) Relasaun ho Individu; Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má nutrisaun, moras krónika, ijiéne pesoál ne’ebé la di’ak.  

Relasiona ho Ambiente mak; Mudansa temperatura ambientál, poluisaun (rai-rahun), asinamentu (kepadatan, overcrowding), falta ventilasaun iha uma, fumadór barak (su’ar hosi sigaru bele hasa’e insidénsia ba moras ne’e) no ahi-su’ar.

Transmisaun

Moras Infesaun Vias Respiratóriu Aguda (IRA) transmite ka da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Sintóma

Moras Infesaun Vias Respiratóriu Aguda (IRA) sei hatudu sinál no sintóma hanesan; Inus been turu no suli ka inus metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratóriu aguda (IRA) iha oin rua (2) mak tratamentu medikamentoza (ho aimoruk) no tratamentu non-medikamentosa (la uza ai-moruk).

Tratamentu medikamentoza (ho aimoruk): médiku sira mak sei fó aimoruk bainhira ita ba hala’o konsulta iha sentru saúde ka iha ospitál. Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia su’ar, hemu bee no jus barak, deskansa barak no selu-seluk tan.

Prevensaun

Moras infesaun vias respiratóriu fasil tebes atu kona ema maibé fasil tebes mós atu prevene, sé ita iha konsiénsa no kultura saudavel. Asaun ka hahalok sira-ne’ebé ita tenke halo hodi prevene moras ne’e mak hanesan; fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been ekskluzivu ba bebé foin moris to’o fulan neen (6), labele fuma besik, halo vasinasaun, no kuidadu ijiéne pesoál.

Jornalista : Nelia Fernandes

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here