Pesoál Saúde sira prepara hela vasina Booster ba Estudante Ensinu Báziku, Maria Auxiliadora Comoro ne’ebé organiza hosi Madre no Mestra sira , tersa 10/5/2022. Imajen Tatoli/Antonio Daciparu

ERMERA, 16 junu 2022 (TATOLI)—Sentru Saúde Hatulia iha postu administrativu Hatulia, munisípiu Ermera, suku Leimea Craic, kinta ne’e, implementa vasina ho fahe pakote ba komunidade ho objetivu motiva komunidade partisipa másimu iha vasina refere.

“Iha pakote ne’e kapaas liu tanba hetan partisipasaun másimu liu. Ema barak entuziasmu atu mai vasina no sira hetan pakotementu hosi Ministériu Saúde. Tanba ne’e, ha’u sujere ba Ministériu Saúde atu uza métodu ne’e ba iha tempu naruk. Komesa ohin ba oin, ita uza métodu fahe pakote, hafoin fó vasina atu nune’e atrai populasaun mai hetan vasina ne’ebé di’ak,” Xefe Sentru Saúde Hatulia, José Ximenes Martins, hateten ba jornalista sira, iha Sentru Saúde Hatulia, Leimea Craic.

Pakote vasina ne’e, Sentru Saúde Hatulia fó ba komunidade ne’ebé simu vasina Booster no sira ne’ebé hetan doze dahuluk no doze daruak, atu nune’e motiva sira mai nafatin.

Maske nune’e, komunidade iha suku Leimea Craic ba primeira no segunda doze atinje ona 75% no ba estudante iha eskola sira atinje 68%, hela 24 no 25%, tanba udan boot no mota tun, entaun membru pesoál saúde iha Sentru Saúde Hatulia labele halo intervensaun.

“Maibé, agora dadaun ami esforsu iha semana 27 no 28 fulan ne’e atu vasina ba aldeia sira-ne’ebé seidauk tama segundu doze ba aldeia Lakiama ho Glutur,” nia dehan.

Maibé ba vasina Booster, daudaun ne’e atinje ona 78% iha suku Leimea Craic no vasina ne’ebé Sentru Saúde Hatulia fó ba komunidade, dahuluk asegura vasina sufisiente iha sentru saúde no karik menus ba foti hosi Saúde Munisípiu Ermera.

Esterlina Gonsalvez sente kontente ho Ministériu Saúde, liuhosi Sentru Saúde Hatulia implementa vasina ho pakote, tanba komunidade barak hakarak tebes simu vasina.

“Ami simu pakote ne’e tanba vasina kompletu. Tanba ne’e, ohin ha’u simu vasina kompletu ona, nune’e bele prevene hosi moras,” nia dehan.

Entretantu, pakote ne’ebé Sentu Saúde Hatulia fó ba komunidade suku Leimea Craic, hanesan, sabaun haris, pepsodent, rinso no eskova kose nehan.

Enkuantu, tuir dadus hosi Administradór Postu Administrativu Hatulia, Luis Manuel katak totál xefe familia iha suku Leimea hamutuk 118 ho nia populasaun hamutuk rihun 1.179.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here