Reuniaun KKM Viqueque iha salaun administrasaun, kinta (16/06). Imajen Tatoli/Vitorino Lopes da Costa

VIQUEQUE, 16 juñu 2022 (TATOLI)—Konsellu Konsultivu Munisípiu (KKM) Viqueque, kinta ne’e, realiza enkontru ne’ebé iha biban ne’e deside postu administrativu Ossu hetan oportunidade dahuluk ba Uma Kbiit Laek (UKL)+ kategoria A no postu administrativu Viqueque kategoria B.

“Ha’u sente postu Ossu hanesan odamatan ba ema hotu. Tanba ne’e, ha’u deside faze dahuluk ba UKL+ ne’e postu Ossu lai. Espera ita esforsu hodi fó rezultadu di’ak atu ema tama Viqueque bele haree, hafoin maka postu sira seluk ne’ebé seidauk hetan,” Prezidente meza KKM no atuál Administradór munisípiu Viqueque, Januário Soares ‘Bolly’, informa ba Agência Tatoli, hafoin ramata enkontru, iha salaun administrasaun munisipál.

Notísia relevante: MAE sei distribui materiál konstrusaun UKL+ ba benefisiáriu iha agostu

Enkontru ne’e partisipa hosi Administradór munisípiu Viqueque, Administradór postu lima, xefe suku na’in-36 no akompaña hosi ekipa PNDS hodi deside alvu implementasaun UKL+ iha munisípiu Viqueque.

Tuir autoridade munisipál, desizaun hili postu Ossu ba implementasaun faze dahuluk UKL+ ne’e di’ak ba Viqueque tomak, maski  postu Ossu iha dazafiu hanesan estrada a’at, tanba ne’e tenke tau-matan nune’e labele difikulta implementasaun.

Durante implementasaun sei kria uma hamutuk unidade 70, enkuantu ba UKL+ B sei apoiu kalen hodi troka benifisiáriu sira-nian uma ne’ebé kalen a’at ona.

“Postu Viqueque vila maka hetan kategoria B, ha’u husu xefe suku sira halo vizita ba família UKL regular hodi tau ketak lista ida no UKL+ kategoria B tau ketak, nune’e labele taka dalan ba maluk sira,” nia akresenta.

Tipu UKL+ A maka uma ida ho kustu $13.000, harii iha rai medida metru kuadradu 10×12, kuartu tolu, sala, han fatin, haris fatin, fasilidade instalasaun eletrisidade no instalasaun bee-moos ba benifisiáriu sira.

Iha fatin hanesan, Sekretaria Téknika Programa Nasionál Dezenvolvimentu Suku (PNDS), Claudinha Soares Pinto, apresia ho desizaun Administradór.

“Implementasaun UKL+ ita sei implementa iha tempu badak nia laran. Hafoin ida-ne’e ita sei trasa planu hodi halo sosializasaun ba postu kona-ba alvu no indentifika kandidatu ba benifisiáriu UKL+ sira. Ha’u hatene ita enfrenta dazafiu barak, maibé ho ita hotu nia kolaborasaun implementa PNDS nian bele la’o ho susesu,” nia hato’o.

UKL+ prevee millaun $25 iha Orsamentu Retifikativu ba PNDS hodi implementa iha tinan 2022.

Kona-ba UKL+ kategoria A

UKL+ kategoria A, sei foku ba komunidade ka família kbiit laek tanba kauza hosi situasaun balun ne’ebé la favorese ba sira-nia moris ho kondisaun uma ne’ebé seguru no dignu, hanesan divorsiu, faluk, orfanatu ka lakon inan/aman (mate), vítima sobrevivénsia, dizastre naturál no ema ne’ebé família laiha ka família heuwai no hela mesak.

Atividade UKL+ kategória A hanesan konstrusaun uma permanente hamutuk ho toilet, maibé la inklui dapur.

UKL+ kategoria B reabilita uma kakuluk 

UKL+ kategoria B,  foku ba komunidade família ne’ebé relativamente iha rendimentu ekonomia  natón, sufisiénte ba sira-nia uma laran hodi moris, maibé la natón/la sufisiénte atu hadi’a sira-nia uma hodi moris ho saudável, dignu no seguru.

Atividade UKL+  kategoria B,  halo distribuisaun Kalen ba komunidade sira ne’ebé iha uma ona ho semi permanente ka permanente, maibé ho kondisaun zinku a’at, ferujen no la seguru ona.

Jornalista  : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here