Prezidente Autoridade RAEOA, Arsénio Paixão Bano, inaugura projetu perfurasaun sistema bee-moos iha sub-rejiaun Pante Makasar no Oésilo. Imajen mídia ZEESM.

OÉ-CUSSE, 15 juñu 2022 (TATOLI) –Prezidente Autoridade Rejiaun Administrativa Espesiál Oé-cusse Ambeno (RAEOA), Arsénio Paixão Bano, kuarta ne’e inaugura projetu perfurasaun sistema bee-moos unidade tolu ne’ebé konstrui hosi empreza Mira-Mar Unip, Lda iha sub-rejiaun Pante Makasar no Oésilo.

Projetu perfurasaun sistema bee-moos unidade tolu ne’ebé konstrui hosi empreza Mira-Mar Unip, Lda ezekuta, autoridade prevee Orsamentu Jerál Estadu (OJE) 2020 tanba situasaun COVID-19 afeta ba konstrusaun hotu nia progresu la’o tarde.

Iha sub-rejiaun Pante Makasar konstrui iha suku Bobokase, aldeia Bihala, bairru Nusla’o, ho valór orsamentu hamutuk $448.655.15, hodi distribui direita ba kumunidade suku Bobokase, aldeia Noenine iha suku Lalisuk, no Kiukole iha suku Naimeko.

Iha suku suku Lalisuk konstrui iha iha aldeia Usapibela bairru Aenmat, atu kanaliza no distribui bee-moos ba komunidade suku Lalisuk, aldeia Usapibela no Suku Cunha, bairru Biseo no Nunuheno, ho valór orsamentu $548,440.13.

Nune’e mós iha sub-rejiaun Oésilo konstrui iha suku Bobometo iha mota Noel Ekat atu kanaliza no distribui bee-moos ba komunidade iha suku Bobometo, aldeia Saben, Usapikolen ho valór orsamentu $516,861.66, maibé kompañia seidauk finaliza kanalizasaun distribuisaun torneira ba uma komunidade sira.

Nune’e, Prezidente Autoridade RAEOA, Arsénio Paixão Bano, enkoraja komunidade sira atu utiliza fasilidade bee-moos hirak-ne’e tuir nesesidade, no tenke sai na’in ba sasán ne’ebé Estadu harii ona.

“Ha’u kontente tebes tanba ohin ita hamutuk iha fatin ida-ne’e inaugura perfurasaun bee-moos fatin tolu, ha’u fiar katak komunidade sira, sei sai na’in ba obra hirak-ne’e, tanba autoridade uza osan Estadu mak harii, ne’e ha’u husu atu kuidadu obra sira-ne’e, atu uza nafatin to’o jerasaun tuir mai,” Arsénio Bano, ko’alia iha serimónia ne’ebé hala’o iha suku Bobokase.

Autoridade ne’e informa, daudaun ne’e konstrusaun perfurasaun sistema bee-moos fatin haat komunidade utiliza ona, iha sub-rejiaun Pante Makasar iha suku Cunha bairru Sonamnasi, aldeia Nemun, iha Suku Taiboko, no Noana suku Lela-Ufe, sub-rejiaun Nítibe.

Alende ne’e iha pontikais Iwan kitahara Mahata konstrusaun sei la’o hela, nune’e mós iha suku Lalisuk, aldeia Padiae mós kontrusaun sei la’o no iha Lakufoan ho Oe-nunu nian hanesan, tanba aurtoridade nia hakarak komunidade labele iha problema kona-bá bee-moos.

Tán ne’e, autoridade espera obra sira-ne’e bele benefísia ona komunidade tanba Autoridade investe maka’as ona ba setor bee-moos.

Xefe Aldeia Usapibela hosi suku Lalisuk, Cobus Cusi, agradese ba Autoridade RAEOA tanba bele lori dezenvolvimentu to’o komunidade iha baze atu asesu ba fasilidade bee-moos, no agradese mós empreza tanba durante ne’e kria kooperasaun di’ak ho komunidade to’o konklui konstrusaun.

“Ami laiha buat ida, ami só agradese de’it ba Governu Timor-Leste liuliu autoridade RAEOA tanba fasilita bee-moos iha ami-nia suku no aldeia, ami orgullu tanba bele fasilita ona ami-nia nesesidade loron-loron nian, liuliu ba oan sira bele asesu eskola ho di’ak tanba iha fasilidade bee-moos iha uma balu asesu de’it iha bee-posu,” nia orgullu.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here