Xefe Suku Samalari, Sorteiro Sequiera Magno. Imajen/Osória Marques.

DILI, 15 juñu 2022 (TATOLI)–Xefe Suku Samalari, postu adminitrativu Baucau Vila, munisípiu Baucau, Rui Sorteiro Magno Siqueira, hateten to’o agora xefe suku hotu-hotu iha Baucau seidauk simu osan insentivu ne’ebé mak Governu hasa’e ba $250.

Notísia Relevante: Xefe suku sira sei simu saláriu $250 iha fulan-maiu

“Iha periódu dahuluk ba implementasaun insentivu $250, ami seidauk hetan no ami nafatin ho $140. Agora ba fulan neen (6) ona maibé ami seidauk sim,u entaun ami labele hateten katak kompromísiu Governu nian ba $250 ne’e kumpre ona,” Xefe Suku Samalari ne’e hateten liuhosi telefónika ba Agência TATOLI, kuarta ne’e.

Autoridade lokál ne’e hatutan, la’ós de’it xefe suku Samalari maibé xefe suku hotu-hotu iha Baucau seidauk simu, tanba ne’e presiza haree no tau ba konsiderasaun.

“Normalmente ami hanesan xefe suku maibé ami ne’e maihosi povu no povu hili ami sai povu nia matan no ibun, ne’ebé atu hato’o povu nia aspirasaun ba Governu. Karik Governu konsidera ami hanesan liman-ain Governu nian mak tenke respeita no konsidera ami-nia direitu,” nia dehan.

Aleinde ne’e, nia husu, atu di’akliu Governu tenke tau konsiderasaun hotu ba konsellu suku ne’ebé mak kompostu hosi Xefe suku to’o lia-na’in, tuir ona Sekretáriu Estadu Profesionál no Empregu (SEFOPE) nia planu.

“Ami hakarak Governu aloka orsamentu hanesan iha lei nia oin, labale tau ida iha lei nia oin no balun tau iha lei nia kotuk, ne’e la di’ak. Presiza konsidera hanesan ema hotu iha Timor-Leste,” nia dehan.

Hatán ba kestaun ne’e, Prezidente Autoriadade Munisípiu Baucau, Olivio Freitas, hateten xefe suku sira seidauk hatama relatóriu trimestre dahuluk, nune’e seidauk bele transfere osan ba konta munisipál nian.

“Ita halo relatóriu mak foin osan ne’e bele tama. Tanba iha trimestre dahuluk, xefe suku sira seidauk haruka relatóriu tanba buat hotu tuir relatóriu hafoin nasionál prosesa no haruka osan mai konta munisipál,” nia dehan.

Notísia Relevante: PN aprova: saláriu xefe suku $140 hasa’e ba $250

Jornalista : Osória Marques

Editór     : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here