Xefe Suku Caicoli, Hipolito Marques Ximenes. Imajen/Osória Marques.

DILI, 15 juñu 2022 (TATOLI)–Xefe Suku Caicoli, postu administrativu Na’in Feto, munisípiu Dili, Hipolito Marques Ximenes, informa iha fulan-juñu ne’e nia parte simu salariu ka osan insentivu $250 tanba osan refere tama ona iha konta bankária xefe suku sira-nian.

Notísia Relevante: PN aprova: saláriu xefe suku $140 hasa’e ba $250

“Ami simu tiha ona osan insentivu $250 iha fulan-juñu ne’e, maibé simu dala ida ho fulan-janeiru to’o mai maiu nian ne’ebé Governu haruka ba Parlamentu Nasionál aprova depois Prezidente Repúblika sesante promulga no osan ne’e sai duni ona,” Hipolito Marques Ximenes hateten ba Agência TATOLI, iha sede suku Caicoli, Dili, kuarta ne’e.

Ho nune’e, nia dehan, VIII Governu Konstitusionál ne’e kumpre duni no hakarak agradese ba Governu tanba bele hasa’e ona sira-nia salariu ka osan insentivu kada fulan nian.

Nia dehan, xefe suku ne’ebé antes ne’e ho intensivu kada fulan ida $140 hasa’e ba $250, xefe aldeia antes ne’e ho intensivu kada fulan ida $100 hasa’e ba $150, pesoál apoiu servisu administrasaun suku antes ne’e ho intensivu kada fulan ida $115 hasa’e ba $140, delegadu no delegada ho lia-na’in sira antes ne’e ho intensivu ho $30 hasa’e ba $40 kada fulan.

Entretantu Xefe Suku Camea, Matos de Deus, hateten osan insentivu ne’ebé Governu hasa’e ne’e sufisiente ona ba sira no osan ne’e sira simu $250 iha fulan juñu maibé simu mós osan hosi timestre dahuluk mak hahú hosi janeiru to’o marsu aumenta ho fulan-maiu nian.

“Ha’u pessoal ne’e bele dehan sufisiente ona tanba bele nesesita ona ha’u-nia nesesidade loron-loron nian,” nia dehan.

Ministru Administrasaun Estatál (MAE), Miguel Pereira de Carvalho, hateten bainhira membru konsellu suku eleitu iha 2004 hahú ho subsídiu sira ho valór $15, ho alterasaun subsídiu akontese iha 2012 no halo revizaun iha tinan 2014 konsege hasa’e insentivu subsídiu ba xefe suku sira ho $140 no to’o agora halo ona tinan hitu tempu ona presiza hasa’e insentivu ba líder komunitária sira.

Tuir dadus, iha territóriu nasionál ne’e xefe suku sira hamutuk 452 no hosi suku 452 ne’e, xefe aldeia hamutuk 2,233, pesoál apoiu administrasaun suku hamutuk 452, delegadu ka delegada no lia-na’in hamutuk 5,822 ne’e inklui Rejiaun Administrativa Espesial Oé-Cusse Ambeno (RAEOA).

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here