DILI, 15 juñu 2022 (TATOLI)— Empreza Weststar Aviation hosi Indonézia iha kompromisu atu koopera ho Governu Timor-Leste hodi fó kapasitasaun ba Timór-oan atu sai pilotu ba elikópteru.
Diretór empreza Weststar Aviation Indonézia, Suardi M. Panua, hato’o kompromisu ne’e bainhira halo enkontru ho Prezidente Repúblika, José Ramos Horta, iha Palásiu Prezidensiál, Bairru-Pité, kuarta ne’e.
“Buat ne’ebé importante tebes mak bainhira ami halo operasaun iha Timor ba tempu naruk, ami mós hakarak dezenvolve joven Timór-oan sira iha loron ruma bele sai pilotu ba elikópteru, nune’e tinan lima ka sanolu mai bele lori elikópteru no enjeñeiru iha área petrolíferu Maibé ida ne’e tenke iha lai servisu hamutuk ho Governu Timor-Leste,” Diretór Weststar Aviation hosi Indonézia ne’e, hateten ba ba jornalista sira.
Alende ne’e, Empreza aviasaun hosi Indonézia mós hakarak halo investimentu iha setór aviasaun hodi tulun empreza petrolíferu sira ne’ebé ba halo servisu petrolíferu iha Timor-Leste.
“Ami mós hakarak serbisu hamutuk ho Governu liuliu ho empreza petrolíferu iha Timor-Leste hodi fasilita tula traballadór ne’ebé serbisu iha kampu Bayu-Undan no halo operasaun iha área parte konta súl nian bainhira Governu Timor-Leste presiza,” nia afirma.
Nune’e, Weststar Aviation Indonézia hahú prepara-an atu iha servisu hamutuk ho empreza nasionál timór-oan nian hanesan Weststar Gap Aviation. Weststar Aviation Indonézia halo de’it charter ba traballadór empreza petrolíferu sira no sei la halo atendimentu bá públiku tanba servisu ne’ebé empreza sei halo ne’e espesifiku tebes.
Iha sorumutuk ne’e, troka mós ideia ho kona-ba dezenvolvimentu ekonomia, agrikultura no dezenvolvimentu rekursu umanu.
Jornalista: Natalino Costa
Editór : Florencio Miranda Ximenes