Vítima Inundasaun 04 abril 2021, Romana de Jesus. Imajen Tatoli/Nelia Fernandes.

DILI, 15 junu 2022 (TATOLI)—Vítima Inundasaun 04 abríl 2021 ne’ebé daudaun hela iha Eskola Bázika Sentrál (EBC, sigla portugés) Hera, sente la seguru nune’e husu Governu liuhosi Autoridade Munisípiu Dili atu muda sai vítima hosi fatin eskola.

Notísia Relevante: Xefe suku Hera husu Governu apoia vítima inundasaun 04 abríl

“Ami hela iha EBC Hera sente la seguru, tanba fatin ne’e estudante sira eskola. Nune’e, ami hakarak Governu haree ami-nia kondisaun. Se bele muda ami hosi fatin ne’e ba fatin seluk, nune’e ami bele sente hakmatek,” Vítima 04 abril 2021, Romana de Jesus, hateten ba Agência Tatoli, iha EBC Hera, kuarta ne’e.

Tuir nia, durante hela iha EBC Hera hasoru difikuldade barak mak menus bee-moos no atu fila ba hela fatin mós labele tanba fatin la seguru.

“Agora ami labele fila-fali ba ami-nia hela fatin, tanba fatin ne’ebá risku, tanba ne’e ami hela iha ne’e hodi hein Governu nia desizaun,” nia dehan.

Kona-ba opsaun Governu atu vítima fila ba munisípiu orijinál no hein desizaun Governu, vítima ne’e hateten nia parte hein desizaun Governu tanba iha munisípiu mós hela fatin laiha.

“Ha’u hili, hein desizaun hosi Governu. Ami ba foho mós fatin laiha, tanba ami hela iha Dili kleur ona no ha’u-nia katuas oan mós servisu iha ne’e, entaun ami labele ba iha ne’ebá,” nia dehan.

Maske nune’e, nia parte sente triste tanba hela iha EBC Hera hamutuk ho nia familia, hanesan katuas oan ho oan mane na’in-rua kuaze tinan ida ho balun ona no Governu kleur ona mós la vizita.

“Ita-nia Governu kleur ona la mai vizita iha ne’e, sira la mai durante iha fulan hirak nia laran, nune’e mós ita-nia Administradór Cristo Rei,” nia dehan.

Administradór Cristo Rei, Venancio Tavares, hateten relasiona ho muda sai vítima inundasaun 04 abríl 2021 iha EBC Hera, desizaun ne’e Administradór Cristo Rei labele foti maibé nia parte sei informa ba Autoridade Munisípiu Díli (AMD) hodi haree preukupasaun ne’e.

“Tanba, Governu agora prepara hela uma asesivel iha Hera, aldeia Halidolár no iha mota kiik halo uma multifunsaun. Entaun, ita-nia vítima sira-nia preukupasaun ne’e Governu prepara hela atu halo uma ne’e. Sira-ne’ebé hetan dezastre rai laiha, hein lai Governu sei halo programa ne’e atu koloka sira ba. Se sira (vítima) iha rai, ne’e ita bele halo ona uma, maibé se rai laiha ita labele halo buat ida. Tanba ne’e, Governu hanoin halo uma asesivel no multifunsaun atu sira hela. Se ita ezije agora kedas atu halo ne’e rai iha ne’ebé, tanba ne’e tenke hein,” nia esplika.

Se vítima 04 abríl balun mak iha rai atu konstrui uma ne’e, bele informa ba Governu nune’e bele fó apoiu materiál konstrusaun hodi konstrui uma.

“Se rai laiha Governu prontu fó materiál, maibé rai tenke ita-nia rasik. Tanba ne’e, Governu hamosu ona uma ka fatin ne’ebé atu halo uma hodi hela, entaun sira (vítima) tenke hein,” nia dehan.

Entretantu, vítima 04 abril iha Hera ne’ebé agora hela iha sentru akollamentu iha fatin rua mak  hanesan iha sentru akollamentu Haburas iha uma-kain 26 no iha Eskola Bázika Sentrál Hera iha uma-kain sia (9).

Notísia Relevante: Governu kontinua re-aloka vítima inundasaun ba munisípiu orijinál

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here