Prezidente Tribunál Rekursu, Deolindo dos Santos. Imajen Tatoli /Egas Cristóvão

DILI, 15 juñu 2022 (TATOLI)— Prezidente Tribunál Rekursu (PTR), Deolindo dos Santos, informa, sei enfrenta hela problema rekursu umanu no infraesturtura ne’ebé adekuadu atu fasilita funsionamentu normal iha Tribunal Rekursu no Tribunal Primeiru Instásia sira.

Deolindo dos Santos hato’o kestaun ne’e, bainhira marka enkontru ho Prezidente Repúblika, José Ramos Horta, atu informa kona-ba funsionamentu Tribunál sira nian.

“Difikuldade ne’ebé ke ita hasoru mak falta rekursu umanu, falta infraestrutura liuliu liga ba fatin serbisu ne’ebé juíz no ofisiál justisa ne’ebé la sufisiente. Nune’e ha’u hato’o Prezidente Repúblika hodi buka solusaun ba ida,” Prezidente Tribunál Rekursu (PTR), hateten ba jornalista sira iha Palásiu Prezidensiál Bairru-Pité.

Nune’e, Nia dehan importante tebes atu forma juís foun sira atu fó asisténsia jurídika ba Timór-oan tanba daudaun tribunál iha juís 37, maibé maioria iha ona idade reforma.

“Kona-ba rekursu umanu, Supermu Tribunál ba Justisa daudaun forma hela juís kadidatu na’in-22 no ofisiál justisa nain-25 iha Sentru Formasaun Jurídika no Judisiária Dili,” nia afirama.

Kona-bá infraestrutura, Prezidente TR informa konstrusaun edifisiu Supremu Tribunál ba Justisa sei harii iha tinan ne’e liuliu konstrusaun Tribunál Rekursu no Tribunál Distritál sira ne’ebé atu harii iha munisipiu hotu bazia ba  lei organizasaun judisiáriu.

“Konstrusaun ba tribunál sira ne’e sei konstrui modelu ida dei’t ho ninian dezeñu agora dadaun iha prosesu diskusaun hela,” nia afirma.

Nune’e, Xefe Estadu apresia serbisu Tribunál maski sei enfreta problema lubuk ida no husu tribunál kontinua serbisu ho imparsialidade.

“Prezidente Repúblika husu atubele tribunál nu’udar orgaun ne’ebé Estadu nian ho pilar importante iha área justisa nian halo serbisu di’ak, hodi fó justisa ne’ebé diak liu povu Timór no mantein nafatin tribunál hanesan orgaun independente ba sidadaun hotu,” nia afirma.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here