iklan

EDUKASAUN, HEADLINE

Tinan 11 eziste, FDCH gasta millaun $300 ba bolsa estudu 7.000

Tinan 11 eziste, FDCH gasta millaun $300 ba bolsa estudu 7.000

Diretór Ezekutivu FDCH, Cristóvão dos Reis. Imajen Tatoli/Francisco Sony

DILI, 15 juñu 2022 (TATOLI)—Fundu Dezenvolvimentu Kapitál Umanu (FDCH) durante ezisténsia tinan 11, hahú tinan 2011 to’o 2022, gasta ona millaun $300 hodi fó bolsa estudu ba timor-oan hamutuk 7.000 ne’ebé eskola iha rai-laran no rai-li’ur.

Tuir Diretór Ezekutivu FDCH, Cristovão dos Reis, instituisaun ne’e eziste ho objetivu atu reforsa rekursu umanu iha país ida-ne’e, nune’e apoiu ona bolsa estudu ba timor-oan atu kontinua sira-nia estudu, ne’ebé hosi totál benefisiáriu, 4.000 konsege gradua ona, maibé 3.000 sei ativu iha estudu, no hosi númeru ne’e maioria eskola iha Timór.

“Hosi 4.000 ne’ebé termina ona estudu, iha 350 mak hetan ona serbisu no seluk seidauk hetan ho razaun sei kumpre hela programa estájiu profisionál ne’ebé hala’o iha liña ministeriál sira inklui empreza no sosiedade sivíl sira,” Diretór Ezekutivu FDCH informa iha sala VIP Aeroportu Internasionál Prezidente Nicolau Lobato, Comoro, kuarta ne’e.

Notísia relevante: FDCH fó ona bolsa estudu ba timor-oan 6.401 durante tinan-sia

Aleinde ne’e, bolseiru sira ne’ebé kontinua estudu halo ona akordu ho Governu tanba durante ne’e uza osan Estadu

“Akordu ne’e vale ba sira iha rai-laran no rai-li’ur, tuir kontratu ezije benefisiáriu sira tenke prienxe rekizitu ka kritériu ne’ebé FDCH estabelese ona, kuandu sira la kumpre kontratu ne’e sei hapara sira-nia bolsa estudu,” nia akresenta.

Maibé molok atu hapara, FDCH sei halo uluk monitorizasaun, avaliasaun no fiskalizasaun ba joven sira ne’ebé maka hetan bolsa estudu.

“Hanesan foin lalais ne’e iha estudante hamutuk 53 ne’ebé eskola iha ITS no UNUD Indonézia, hanesan veteranu nia oan sira, FDCH estabelese ona kritériu no rekizitu ba sira no programa bolsa estudu ne’e iha tipu bolsa kompleta, bolsa parsiál no subsídiu. Kuandu bolsa rua ne’e maka benefisiáriu sira la kumpre ona mak sei hapara bolsa ba sira,” nia haktuir.

Cristovão dos Reis dehan, apoiu ne’ebé fó tenke útil, tanba ne’e iha rekezitu no kritériu, ne’ebé iha ekipa ida maka sempre halo monitorizasaun avaliasaun no fiskalizasaun.

“Valór ne’ebé ita estabelese ona ba kursu siénsia sosiál iha Ázia 3,0 no siénsia naturál 2,75. Agora ba Europa ita estabelese valór ba siénsia sosiál médiu 14 no ba siénsia naturál valór médiu 13,” nia tenik.

Jornalista : Tomé Amado

Editora      : Julia Chatarina

iklan
iklan

Leave a Reply

iklan
error: Content is protected !!