Prezidente Timor GAP,E.P, António José Loiola de Sousa. Imajen Tatoli/Egas Cristóvão

DILI, 15 juñu 2022 (TATOLI)–Timor Gas no Petróleu , Empreza Públika (Timor GAP, E.P) sei halo peskiza kona-ba esplorasaun petróleu no Gas Naturál Liquifeitu (LNG) iha bloku A, iha munisípiu Lautém.

“Ekipa sei halo sensibilizasaun ba komunidade Lautém kona-ba importánsia hosi rikusoin nasaun nian, nune’e ita bele serbisu hamutuk iha prosesu peskiza ne’e,” Prezidente Timor GAP, E.P, António José Loiola de Sousa, hateten ba Agência Tatoli, iha City 8, Manleuan, kuarta ne’e.

Antes ne’e, iha loron 22 abril 2022, Autoridade Nasionál Petróleo no Minerál (ANPM), fó sai rezultadu konkursu públiku lisensiamentu petrolíferu segunda ronda períodu 2019/2022 ba bloku 18 kompostu hosi tasi-laran 11 no rai-maran hitu, ne’ebé hatudu empreza lima kompostu hosi empreza nasionál rua no internasionál tolu mak sei halo atividade iha bloku lima.

Empreza ne’ebé toma konta iha bloku rai-maran mak Timor GAP, E.P ba bloku A, ETO, Lda ba bloku B, HTS Exploration ba bloku F, enkuantu iha tasi-laran mak Eni Austrália B.V ba bloku P, no Santos ba bloku R.

Notísia relevante: Empreza lima sai manán-na’in ba lisensiamentu petrolíferu bloku 18

António José dehan, Timor GAP, E.P manán ona konkursu públiku ba peskiza esplorasaun petróleu no LNG iha Lautém, tanba ne’e sei halo parseria ho Timor Resources, ne’ebé antes ne’e asina kontratu ho ANPM hodi peskiza bloku C iha Ainaro no Manufahi.

Nune’e, sira sei hato’o planu serbisu no orsamentu ba ANPM hodi hetan autorizasaun ba estudu jeolojia ba perfurasaun sízmika. 

“Ami tenke halo estudu jeolojia ba perfurasaun sízmika no importante tebes bele serbisu parseria ho empreza sira seluk hodi hetan ekipamentu peskiza,” nia tenik.

Jornalista  : Arminda Fonseca

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here