Defisiente Raul da Costa suru no pineira hela rai-henek iha mota Comoro. Imajen/ Hristo Alves dos Santos

“Ema la sosa, entaun ami ba empresta viziñu sira-nia osan hodi sosa foos hodi te’in han. Karik, ema la fó, entaun ami tahan la han loron ida tomak…”

 DILI, 15 juñu 2022 (TATOLI)–Raul da Costa ho idade 70 nu’udar defisiente matan no kanotak, hamutuk ho família, nu’udar vítima ida husi inundasaun ne’ebé mak akontese iha loron 4 abril 2021 tanba sira-nia uma (hela-fatin) bee lori totál inklui sasán uma-laran hetan estragu.

Tanba ne’e, maske Governu ajuda ona hodi konstroi hikas nia hela fatin maibé to’o ohin loron seidauk hetan naroman tanba seidauk hetan instalasaun eletrisidade hodi fasilita nia hamutuk ho família iha tempu kalan. Iha fiu-metan rolu ida, iha Raul nia uma, tuir observasaun Tatoli, maibé rai de’it no seidauk uzadu hodi halo instalasaun husi parte kompetente.

“Iha 4 abril udan-boot mai hodi hamosu inundasaun no mota lori ami-nia uma hodi ami evakua ba Don Bosco, Comoro. Governu ajuda halo ami-nia uma maibé eletrisidade laiha. Kalan ami sunu lilin de’it hodi tuur iha naroman hodi han,” Defisiente Raul hateten ba Tatoli, iha nia kna’ar fatin mota-laran parte ponte CPLP iha domingu (12/06), ne’ebé ladook husi nia hela fatin, iha Aldeia Kampung Merdeka, Suku Madohi-Comoro, Postu administrativu Dom Aleixo, munisípiu Dili.

Tuir defisiente Raul katak tanba seidauk hetan eletrisidade nune’e bainhira tempu kalan maske viziñu sira hela besik hetan naroman maibé sira uza de’it lilin hodi han no fasilita oan hodi estuda, depois ida ne’e toba iha nakukun laran.

Iha ona instalasaun eletrisidade ho lampu ida iha sala vizita maibé to’o ohin loron ahi seidauk bele lakan tanba seidauk halo koneksaun husi fiu-boot.

“Sente triste tanba Governu halo ona uma hodi ami mai hela maibé dada de’it fiu iha uma-laran hodi ami haree maibé to’o agora eletrisidade la lakan no ami uza nafatin lilin hodi tuur iha nia naroman hodi han de’it no liutiha ida ne’e ami toba nakukun de’it ona,” nia informa.

Pineira rai-henek sustenta moris

Iha parte seluk, atu sustenta moris no nesesidade uma-laran, defisiente Raul da Costa suru no pineira rai-henek iha mota-laran, parte ponte CPLP.

“Nesesidade obriga ha’u tenke pineira rai-henek hodi sustenta oan ba eskola. Daudaun ne’e ha’u-nia oan ida de’it mak eskola; eskola primária iha Ensinu báziku filiál Fomentu 1 (EBF) no na’in tolu la eskola hodi ajuda ha’u pineira rai-henek tanba kbi’it la to’o,” Defisiente Raul hateten ba Tatoli.

Durante pineira rai-henek, tuir defisiente kanotak no matan ne’e, dala ruma fulan ida mak foin kliente sira sosa.

“Pineira rai-henek loroloron maibé dalaruma ema la sosa to’o fulan ida ho balun mak foin sosa. Agora ne’e ema barak mak pineira rai-henek ne’ebé susar loos ema mai sosa ami-nian. Ema la sosa, entaun ami ba empresta viziñu sira-nia osan hodi sosa foos hodi te’in han. Karik, ema la fó, entaun ami tahan an hodi la han loron ida tomak,” aman husi oan na’in haat ne’e haktuir ho neon-susar.

Bainhira ba observa kondisaun família Raul nian, jornalista Tatoli observa katak Raul ho nia família, nia uma didin ho kalen, haris-fatin kondisaun la seguru no nesesidade bázika menus tebes.

“Loron ida ami han dala rua de’it. Dalaruma foos laiha ami la han toba de’it ona. Sasán dapur mak hanesan sanan ida, tasu ida, balde boot ida, no jerigen (masa) litru rua nian iha 10 no litru lima ne’e iha ida. Ami-nia uma ne’e mos kuartu rua no dapur ida maibé mai sunu ai mak hodi te’in,” Raul informa.

Notísia relevante: Moras bele moras, suru nafatin rai-henek

Jornalista : Natalino Costa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here