Xefi Suku Samalari, Rui Magno Siqueira. Imajen Tatoli/Natalino Belo.

BAUCAU, 15 juñu 2022 (TATOLI) – Agrikultór suku Samalari, postu admistrativu Baucau vila, munisípiu Baucau husu governu investe orsamentu no hadi’a infraestrutura iha setór agrikultura hanesan parte preparasaun ba implementasaun lei podér lokál no desentralizasaun administrativa.

Xefi suku Samalari, Rui Magno Siqueira hateten aldeia haat iha suku Samalari poténsia iha setór agrikultura tanba iha natar ne’ebé luan maibé durante ne’e difikulta tanba laiha fonte finanseiru no infraestrutura mínimu ne’ebé fó impaktu hasa’e produsaun hare kada époka.

“Futuru bainhira Baucau estabelese desentralizasaun admistrativa tenke hasa’e kresimentu família presiza reforsa orsamentu iha setór agrikultura hanesan fasilita kréditu ba agrikultór sira,” Xefi suku Samalari informa ba Agência Tatoli iha Vila Nova, kuarta ne’e.

Suku Samalari prontu garante produsaun hare bainhira governu liuhosi Ministériu Agrikultura no Peska investe iha setór refere hanesan asesu kréditu no hadi’a kanál irrigasaun permanente ne’ebé sempre fó ameasa ba produsaun liuliu mudansa klimátika.

Maioria komunidade iha suku Samalari hala’o atividade agrikultura tuir kondisaun klima no utiliza ekipamentu tradisionál no konstrui kanál irrigasaun rasik ne’ebé kauze kada époka sempre hetan estragu, liuliu bainhira udan boot rezulta kanál irrigasaun hetan estragu no fó impaktu ba produsaun.

Rui Sequeira husu governu aselera infraestrutura iha Samalari ne’ebé antes ne’e iha tinan 2012 halo ona estudu viabilidade atu konstrui irrigasaun rua maibé to’o ohin loron seidauk iha rezultadu.

“Garante produsaun foos, dalaruma postu Baucau vila, suku Samalari hamutuk ho Seiçal bele sufisiente,” nia garante.

Suku Samalari iha aldeia haat kompota hosi aldeia Festau, Ossoluga, Samalari no Sorulai ho totál populasaun hamutuk na’in-4.707 hosi xefi família 681 iha natar ne’ebé daudaun ne’e funsiona hamutuk ektare1.853 no abandona hamutuk ektare 83.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here