Komandante PNTL munisípiu Viqueque, Superintendente Polísia Sebastião Alves Quintão. Imajen Tatoli/Vitorino Lopes da Costa

VIQUEQUE, 15 juñu 2022 (TATOLI)—Polísia Nasionál Timor-Leste (PNTL) munisípiu Viqueque hahú implementa dekretu-lei númeru 06/2003 kona-ba rejime tranzitu Timor-Leste ho rigór.

“Ita haree iha violasaun barak, liuliu iha kapitál Viqueque ema tula malu la uza kapasete, laiha xapa matríkula, hirak ne’e regula hotu iha dekretu-lei nian laran,” Komandante PNTL munisípiu Viqueque, Superintendente Polísia Sebastião Alves Quintão, informa ba Agência Tatoli, iha ninia knaar fatin, kuarta ne’e.

Notísia relevante: PNTL husu Governu monta sinál tránzitu iha Viqueque

Komadante PNTL Viqueque orienta ona membru hahú halo operasaun iha kapitál laran to’o postu administrativu sira hodi haree ema sira ne’ebé la kumpre rejime tránzitu.  

“Tantu iha postu administrativu, ha’u fó ona orientasaun ba komadante postu sira hodi hapara ema sira ne’ebé kontra regra tránzitu, tanba laiha ema ida mak boot liu lei, ema hotu iha lei nia okos,” nia fó hanoin.

Nia dehan, ema ne’ebé maka laiha karta kondusaun, konsidera la kumpre dekretu-lei númeru 06/2003 rejime tranzitu liga ba kódigu penál artigu 207 katak tenki tama sela tinan rua ka multa konforme lei haruka.

“Hosi  operasaun PNTL iha kapitál Viqueque ba karta kondusaun motorizada no kareta seidauk apreende motorizada no kareta tanba sira iha hotu dokumentu, iha violasun de’it ba kódigu estrada no tula malu la uza kapasete. Ho ida-ne’e ita agora komesa haree ba labarik minor idade sira la lori ona motorizada, uluk ita haree ema halai motorizada no kareta la’o tuir ida-idak nia hakakrak, maibé agora iha ona mudansa iha kapitál Viqueque,” nia dehan.

Tuir Komandante PNTL munisipál ne’e, antes ne’e implementa ona rejime tránzitu iha Viqueque maibé pasivu liu.

“Ho ida-ne’e  PNTL munusípiu Viqueque hamutuk ho unidade tránzitu halo patrullamentu iha kapitál Viqueque laran atu kontrola ema sira ne’ebé la uza kapasete no viola kódigu estrada,” nia tenik.

Jornalista  : Vitorino Lopes da Costa

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here