DILI, 15 juñu 2022 (TATOLI)-–Primeiru-Ministru (PM), Taur Matan Ruak, kuarta dadeer ne’e, dezloka bá Singapura hosi Aeroportu Internasionál Prezidente Nicolau Lobato, Comoro, ho Batik Air, hodi hala’o tratamentu saúde iha Mount Elizabeth Novena Hospital no sei filafali mai Timór iha loron 29 juñu.
Tratamentu saúde iha rai-li’ur hanesan rekomendasaun hosi médiku Hospital Nacional Guido Valadares (HNGV) nian.
“Durante pandemia COVID-19, Xefe Governu hala’o de’it check-up iha HNGV Dili, tanba ne’e, médiku rekomenda atu Xefe Governu presiza ba tratamentu saúde iha ospitál mais avansandu atu médiku espesialista sira bele kontrola di’ak Xefe Governu nia kondisaun saúde, ne’ebé kauza hosi konsekuénsia tinan 24 gerilla iha ai-laran ho kondisaun la favorável,” refere nota ne’ebé Agência Tatoli asesu hosi Gabinete Xefe Governu.
Notísia relevante: Ministru José Reis bá halo tratamentu saúde iha Malázia
Enkuantu, durante Xefe Ezekutivu iha rai-li’ur, atuál Vise Primeiru-Ministru no Ministra Solidaridade Sosiál no Inkluzaun, Armanda Berta dos Santos, mak sei asume pasta Primeiru-Ministru interina.
Iha biban ne’e, membru Governu balun akompaña Xefe Governu iha sala espera VIP.
Jornalista : Antónia Gusmão
Editora : Julia Chatarina
