ONG Belun hasa'e koñesimentu ba eleitór kona-bá eleisaun inkluzivu. Imajen Tatoli/Abílio Elo Nini.

OÉ-CUSSE, 15 juñu 2022 (TATOLI) – Organizsaun Naun Governamentál (ONG) Belun, serbisu hamutuk ho UNDP, ne’ebé hetan apoiu fundu hosi Guvernu Japaun, kuarta ne’e realiza formasaun kona-bá eleisaun inkluzivu ba eleitór foun sira iha Rejiaun Administrativa Espesiél Oé-Cusse Ambeno (RAEOA).

Diretór ONG Belun, Luis da Costa Ximenes, informa, formasaun ne’e realiza durante loron rua, hahú ho formasaun segunda no tersa sei hetan diseminasaun hosi Komisaun Nasionál Eleisaun (CNS, sigla portugés) no Polisía Nasionál Timor-Leste (PNTL), kona-bá lei eleitorál no seguransa nian.

“Objetivu hosi formasaun ne’e atu hametin liután, juventude sira-nia koñesimentu kapasidade nu’udar eleitór foun iha Oé-Cusse, kona-bá eleisaun inkluzivu, no lala’ok eleisaun nian, ne’ebé mak ita liu ona eleisaun prezidensiál, tanba iha tinan oin ita sei hasoru tán eleisaun parlamentár no eleisaun lidér komunitáriu, entaun, nu’udar eleitór presiza kapasita sira tanba foin primeira-vés partisipa iha festa demokrasia ne’e,” Luis da Costa Ximenes, ko’alia iha formasaun ne’ebé realiza iha salaun edukasaun Oé-Cusse.

Nia informa, razaun fundamenta hosi formasaun ne’e, refleta ba pilár hosi ONG Belun nian, kona-bá dezenvolvimentu kapasidade komunidade, nomoos iha área prevensaun konflitu no harii dame.

Formasaun ne’e abertura hosi Sekretáriu Rejionál ba Asuntu Administrasaun no Estatál, Martinho Abani Elo, enkoraja juventude sira atu kontinua habelar informasaun ba família atu kontribui ba prosesu dezenvolvimentu.

“Ohin ita-nia parseriu sira mai eleva ita-boot sira-nia koñesimentu, tán ne’e ha’u husu durante formasaun loron rua ne’e, sai hanesan bukae ida, sai matan no tilun ba ita-nia inan-aman kolega sira, kona-bá saida mak ohin imi hetan ona, tanba joven tenke kontribui ba prosesu dezenvolvimentu iha nasaun ne’e,” nia fó hanoin.

Partisipante Januário Colo, nu’udar juventude eleitór foun, hanesan partisipante sente orgullu, nune’e bele aumenta sira-nia kapasidade tanba juventude maka matan no tilun iha sosiedade ba parte eleisaun inklusivu.

“Benefisiu boot ba ami, liuhosi formasaun ne’e ami bele kompriende matéria liuliu kona-ba eleisaun inkluzivu, ba ami joven feto no mane iha prosesu eleitorál iha mumentu ne’ebé iha festa demokrasia ninian, nune’e bele kontribui partisipa atu aumenta taxa partisipasaun nian,” nia katak.

Partisipante iha formasaun ne’e mai hosi estudante nível sekundáriu hamutuk 11 mai hosi sub-rejiaun Oésilo, Pássabe Nítibe no Pante Makasar, universidade UNPAS no grupu juventude sira.

Bazea rezultadu eleisaun prezidensiál iha 19 abríl 2022, STAE RAEOA rejista eleitór sira partisipa iha eleisaun prezidensiál volta daruak 19 abríl ne’e hamutuk 50.673, maibé votante ne’ebé konsege ezerse direitu votu iha loron eleisaun hamutuk 38.563 ho taxa partisipasaun 76,10%, nomoos rejista votu nulu hamutuk 198 (0,51%), votu branku 54 (0,14%), no votu reklamadu 14 (0,04%).

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here