Grupu negosiante hosi munisípiu Baucau, Lautém, Viqueque no Manatuto hamutuk 60 akompaña hela programa asesu kréditu suave hosi MTKI iha Vila Nova, Baucau, kuarta (15/06). Imajen Tatoli/Natalino Belo.

BAUCAU, 15 juñu 2022 (TATOLI) – Ministériu Turismu, Komérsiu no Indústria (MTKI) kuarta ne’e, sosializa asesu kréditu ho funan-kiik ba grupu negósiu agro-florestrál ne’ebé fasilita hosi Oxfam liuhosi programa ai ba futuru.

Vise-Ministru Turismu, Komérsiu no Indústria, Domingos Lopes Antunes, informa, governu serbisu hamutuk ho Oxfam fasilita sidadaun sira-ne’ebé mak presiza asesu kréditu funan-kiik ne’ebé prienxe ona kritériu hanesan tuir formasaun emprezariál atu hahú negósiu hamutuk grupu 60 komposta hosi munisípu haat; Baucau, Viqueque, Lautem no Manatuto.

“Ita sosializa tanba grupu sira-ne’e merese ona atu asesu kréditu suave tanba tuir ona formasaun,” governante ne’e hateten iha Vila Nova, kuarta ne’e.

Governu hahú implementa eskema garantia kréditu suavel liuhosi kriasaun dekretu-lei 8/2021, alterasaun dahuluk hosi númeru 33/2022, loron 16 fevereiru kona-ba kriasaun kréditu garantia kréditu suave ho funan pursentu tolu, ne’ebé katergoriza ba negosiante ki’ik no médiu sei asesu montante $1.000 to’o $250.000 no negosiante boot bele asesu kréditu hahú hosi $250.000 to’o millaun ida.

Kritéria importante mak tenke tuir formasaun kona-ba negósiu, iha planu negósiu inklui iha sertifikadu linsensa atividade negósiu hosi Servisu Rejistu no Verifikasaun Emprezariál (SERVE).

“Ami-nia esperansa hamutuk ho Oxfam grupu sira-ne’e bele asesu kréditu funan ki’ik atu hadi’a sira-nia moris,” Domingos Antunes akresenta.

Iha orsamentu jerál estadu retifikativu aumenta millaun $50 ne’ebé antes ne’e iha tinan-2021 prevee millaun $1.301.

Country Director Oxfam, Fausto Belo Ximenes, hateten, programa agro-florestrál sustentável ne’e hetan fundu hosi Uniaun Europea (UE) kanaliza hosi GIZ no implementa hosi Oxfam, ne’ebé realiza formasaun ba grupu sira hamutuk 60 hosi munisípiu haat atu apoia negosiantes sira-ne’ebé halo negósiu iha área agro-florestrál.

“Hahú hosi prepara hodi dezenvolve sira-nia planu negósiu to’o formasaun jere orsamentu,” Fausto Ximenes hateten.

Oxfam sei finánsia pursentu 50 ba grupu 30 ne’ebé liuhosi selesaun no ezame tanba tuir planu sei remata iha fulan-outubru hanesan atividade kuda modo no hahan, karpinteiru, bambu ka produtu sira-ne’ebé iha ligasaun ho agrikultura no florestál.

Jornalista   : Natalino Belo

Editór         : Evaristo Saores Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here