Ministru Transporte no Komunikasaun, José Agostinho da Silva, hasai foto hamutuk ho entidade relevante hafoin atribui sertifikadu, iha salaun ANC, kuarta (15/06). Imajen Tatoli/Dália Fátima

DILI, 15 juñu 2022 (TATOLI)—Ministériu Transporte no Komunikasaun (MTK) liuhosi Autoridade Nasionál Komunikasaun (ANC, sigla portugés), kuarta ne’e, entrega setifikadu rejistu ba empreza Kacifik Broadband Satelites Unipessoál, Lda no Sacomtel Lda hodi fornese internet ho velosidade lais.

Ministru Transporte no Komunikasaun, José Agostinho da Silva, hateten, empreza Kacifik Broadband Satelites unipessoál,Lda simu sertifikadu ba Internet Service Provider (ISP) no Sacomtel ba backbone ka inftraestrutura telekomunikasaun liga ba fibra ótika teresteriál.

“Sira simu sertifikadu hatudu katak sira prienxe ona rekezitu anexu B tuir artigu 30 dekretu-lei númeru 15, tanba tuir rekezitu ne’e sira tenke prinxe rekezitu tékniku, administrativu no rekezitu legál, entaun Governu iha dever atu atribui sertifikadu ba sira nune’e sira hala’o sira-nia atividade formalmente iha territóriu laran,” Ministru dehan iha salaun ANC.

Notísia relevante: ANC fó sansaun koima $70.000 ba operadór telekomunikasaun

Empreza rua ne’ebé ohin simu ona sertifikadu, ba oin iha autorizasaun iha cross border tanba iha ne’ebá mundu informasaun komunikasaun no teknolojia (ICT, sigla inlgés), ne’ebé backbone ne’e preparadu tenke prienxe ka enxe ho broadband.

“Kapasidade ka bandwidth ne’ebé durante ne’e problema tanba ita-nia kapasidade limitadu tebes iha parte Governu no parte setór privadu, entaun ninia impaktu mak velosidade internet kualidade lentu no kustu karun,” nia akresenta.

Nune’e, governante ne’e iha espera ho prezensa empreza bele sai parseiru Governu hotu no luta hamutuk bele responde situasaun internet lentu bele sai velosidade lais ho kualidade di’ak no kustu razoável, nune’e kliente sira bele satisfaz.

“Ohin loron importante ba sira no ba ita hotu, ita espera ita hotu esforsu bele fó atendimentu mundu ICT di’ak ba ita-nia kliente sira, tantu privadu no instituisaun Estadu sira,” nia tenik.

Iha fatin, Diretór Sacomtel, Salvador Tilman, agradese ba ANC tanba bele entrega ona sertifikadu rejistu.

“Agradese tebes, ohin ami bele hetan sertifikadu rejistu ba anexu B, hahú agora ba oin ami prepara atu halo servisu operasaun halo infraestrutura liuliu atu responde ba situasaun ne’ebé durante ne’e ema hotu halerik kona-ba liña internet, fiar katak ho sertifikadu ida-ne’e bele rezolve situasaun,” nia dehan.

Tanba pedidu ne’ebé sira hatama ba sertifikadu ne’e, atu korresponde serbisu hamutuk ho PT.Indonesia Comnet Plus (ICON+) ho Sacomtel ne’ebé sei dada fibra ótika hosi Kupang Atambua mai to’o Maliana, Batugade.

“Ho ida-ne’e, bele dehan katak bainhira to’o ona iha Batugade ita fornese kedas 5 GigaByte (GB) pur segundu, ida-ne’e faze dahuluk nian no daruak nian ita bele fornese 10 to’o 100GB pur segundu. Kona-ba previzasaun atu dada fibra óptika, iha kontratu laran ba fulan-hitu, sura hahú ohin to’o ramata maibé espera antes fulan ramata bele inuagura ona iha Batugade. Kona-ba orsamentu ami uza osan privadu totál milliaun $1.2,” nia informa.

Nune’e mós, Diretór Kacific Broadband Satelites, Hugo Martins, hateten, sira sei garante konfiansa ne’ebé Governu fó ba sira hodi oferere internet di’ak ba kliente sira.

“Ohin ami simu sertifikadu, ba oin ami sei oferese servisu di’ak nune’e kliente sira bele sente rezultadu di’ak,” nia otimista.

Jornalista  : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here