Prezidente Konsellu Admistrasaun ANATL, E.P, José Trindade da Cruz Pinto. Imajen Tatoli/Francisco Sony

DILI, 15 juñu 2022 (TATOLI)–Prezidente Konsellu Administrasaun Aeroportu no Navegasaun Aérea Timor-Leste, Empreza Públika (ANATL, E.P), José Trindade da Cruz Pinto, hateten VIII Governu Konstitusionál pleneia ona atu halo konstrusaun ba aeroportu rejionál sira hanesan Ataúro, Viqueque, Manufahi no Bobonaro.

“Ita hakarak halo moris movimentu transporte aérea doméstika nian, ita-nia fatin lubuk ida presiza movimentu transporte aéreu nian maibé infraestrutura ho kondisaun bázika tebes mós ladún iha kondisaun, tanba ne’e Governu iha kompromisu hanoin atu halo konstrusaun ba kampu aviaun rejionál sira,” Prezidente Konsellu Administrasaun ANATL, E.P, hateten ba Agência Tatoli iha Aeroportu Comoro, kuarta ne’e.

Notísia relevante: ANATL, Ep halo simulasaun ahi han aviaun iha aeroportu internasionál Nicolau Lobato

Governu iha kompromisu boot atu halo konetividade transporte aéreu iha Timór ba mundu no mundu mai Timór.

ANATL, E.P daudaun hamutuk ho Ministériu Finansa liuhosi Fundu Infraestrutura orsamenta hela $500.000 hodi halo estudu viabilidade ida, nune’e sei loke konkursu públiku ba dezeñu.

Daudaun ne’e ekipa sira kompostu hosi ANATL, E.P, Fundu Infraestrutura no Ministériu Obra Públika (MAP), ne’ebé hala’o hela estudu viabilidade ba aeroportu rejionál sira.

“Ami-nia responsabilidade halo jestaun iha fatin sira ne’e hotu, maibé aeroportu ne’ebé funsiona hela mak aeroportu Comoro, Covalima, Baucau, Oé-cusse responsabiliza hosi ZEESM,” nia akresenta.

Responsável ne’e dehan, ANATL, E.P hanesan responsável ba aeroportu iha territóriu Timór, iha knaar atu prepara rekursu ho kualidade atu prienxe servisu sira ne’e hodi nune’e bele halo jestaun ba servisu aeroportuária no navagasaun aérea iha Timór laran tomak.

“Rekursu daudaun sufisiente hela atu halo atendimentu, maibé iha ANATL, E.P daudauk funsionáriu públiku lubuk ida mak lisensa sein vensimentu, hafoin halo kontratu.

“ANATL hanesan empreza públika, tuir lei funsaun públika, funsionáriu públiku sira iha direitu ba lisensa sein vensimentu durante tinan-rua no estende tan tinan-ida hodi kompleta tinan-tolu. Daudaun balun atu hotu ona, tanba ne’e ANATL presiza tan ema, maski daudaun ne’e funsionáriu hamutuk 227 hodi halo atendimentu servisu, maibé presiza halo tan rekrutamentu ba ema ne’ebé iha estudu espesífiku ba área sira servisu iha aeroportuáriu no navegasaun aérea nian,” nia esklarese.

Maski nune’e, sei presiza rekursu, tanba ne’e maka hahú rekruta ona agora, nune’e bainhira konstrusaun ramata, rekursu mós iha ona tanba investe ba rekursu umanu la’ós buat fasil.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here