Governu hamutuk organizasaun internasionál lansa rezultadu peskiza kauza traballu infantil iha Covalima. Imajen Tatoli/Celestina Teles.

COVALIMA, 15 juñu 2022 (TATOLI)–Governu liuhosi Komisaun Nasionál Kontra Traballu Infantil no Inspesaun Jeral Traballu hamutuk ho organizasaun internasionál United Nations Children’s Fund (UNICEF) no International Labour Organization Organization Labour (ILO) lansa rezultadu peskiza kualitativa tinan 2022 kauza hosi traballu infantil iha munisípiu Covalima.

“Ohin, ita komemora loron traballu infantil hodi lansa mós rezultadu peskiza kauza hosi traballu infantile tanba iha peskiza ita hatene kauza hosi traballu infantile,” Project Coordinator for MAP16, Jacinto da Silva Caldas Belo, hateten ba jornalista sira hafoin halo lansamentu rezultadu peskiza, iha salaun eskola sukundáriu, Tali-aon, kuarta ne’e.

Aleinde halo lansamentu rezultadu peskiza iha Governu hamutuk organizasaun internasionál Unicef no Internasionál Organization Labour (ILO) iha ambitu komemora loron traballu infantil ne’ebé monu iha loron 12 fulan juñu ne’e.

Bazea ba rezultadu peskiza hosi organizasaun internasional UNICEF no (ILO) hamutuk ho Governu katak, kauza hosi traballu infantil hanesan persepsaun ema-nian, família, inan-aman labarik sira no kauza hosi ki’ak.

Tuir persepsaun ema-nian mak trabalu infantil hanesan meiu ida ba labarik sira atu aprende buka osan rasik no kiak mos sai fator determinante hamutuk ho persepsaun ema-nian.

Tanba ne’e, sira rekomenda no husu Governu atu aprova planu asaun nasionál kontra traballu infantil no Governu hasa’e montante orsamentu bolsa da mãe atu kofre família hotu né’ebé mak vulneravél sira iha kbiit atu sustenta oan sira.

Definisaun traballu infantil katak servisu ne’ebé labarik sira halo prejúdika labarik sira-nia dezenvolvimentu fíziku, mentál, interfere sira-nia edukasaun halo sira falta eskola, maibé ba labarik-sira ne’ebé ajuda inan-aman kuru bee ida-ne’e la’ós kategoria ba traballu infantil.

Rezulatdu peskiza ne’e, organizasaun internasional UNICEF no ILO hamutuk ho Governu hala’o peskiza iha munisípiu sira hanesan Suai-Covalima, Dili, Ermera, Liquiça, Baucau no Rejiaun Administrativa Espesiál Oé-Ccusse Ambeno (RAEOA).

Reprezentante Administradór munisípiu Covalima, Francisco de Alves, reforsa inan-aman haruka labarik sira servisu todan, ne’e kontra konstituisaun RDTL no konvensaun internasionál ba direitu labarik nian.

“Labarik ho otas kiik hala’o traballu infantil ita haree hanesan baibain tanba kultura no ekonomia inan-aman haree sira halo servisu todan, ho orgullu ha’u-nia oan badinas ajuda inan-aman. Maibé ita la hatene atitude kontra konvensaun internasionál no kontra konstituisaun RDTL,” nia dehan.

Serimónia lansamentu rezultadu peskiza kauza traballu infatil ne’e partisipa hosi Governu hamutuk ho organizasaun internasional UNICEF, ILO, diretór munisipal no estudante sira.

Tuir konstituisaun RDTL Artigu 18 fó  Protesaun ba labarik-oan sira hanesan,  labarik sira iha direitu ba protesaun espesiál husi família, komunidade, no mós estadu, liu-liu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no esplorasaun, labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé estadu aprova no simu ona ka ratifika fila-fila no labarik hotu-hotu ne’ebé moris iha kazamentu nia laran ka lae, iha direitu hanesan kona-ba protesaun sosiál.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here