Feto sobrevivente Oé-Cusse realiza feira hodi hakbiit ekonomia liuhosi promove produtu lokál. Imajen mídia ZEEMS.

OÉ-CUSSE, 15 juñu 2022 (TATOLI) – Grupu feto sobrevivente sira hosi sub-rejiaun Oésilo no Pante Makasar iha Rejiaun Administrativa Espesiál Oé-Cusse Ambeno (RAEOA), realiza feira hodi promove produtu lokál, ho tema ‘hakbiit ekonomia sobrevivente hodi promove produtu lokál.

Atividade ne’e organiza hosi Organizasaun Naun Governamentál (ONG) Asosiasaun Chega Ba Ita (ACBIT) iha suku Lalisuk, sub-rejiaun Pante Makasar, ba grupu feto sobrevivente mai hosi sub-rejiaun Oésilo iha suku Bobometo, sub-rejiaun Pante Makasar hosi suku Taiboko no Lalisuk.

Feto sobrevivente Oé-Cusse realiza feira hodi hakbiit ekonomia liuhosi promove produtu lokál. Imajen mídia ZEEMS.

Koordenadór Project Asosiasaun Chega ba Ita (ACBIT), Silveiro Andrade Beli Siri da Silva, hatete, eventu ne’e parte hosi projetu atu reforsa hamutuk implementa hosi ONG ACBIT ho parseiru Hivos no FOKUPERS, ne’ebé hetan apoia fundu hosi Uniaun Europeia.

Nune’e realiza iha Oé-Cusse ho ejenda rua, promove produtu lokál no realiza semináriu, ho tema ‘hakbiit ekonómia sobrevivente hodi promove produtu lokál, atu hakbiit ekonómia sobrevivente’, ho objetivu prinsipál rua.

Ojetivu dahuluk, liuhosi bazar kalan ne’e, atu fó oportunidade ba inan feto sira, no feto negosiante lokál-sira, atubele promove sira-nia produtu lokál, nune’e bele hasa’e sira-nia rendimentu ekonomia iha família atu sustenta oan-sira nia nesesidade.

Objetivu daruak, atu fó espasu ba inan feto sobrevivente-sira, atubele fahe esperiénsia no aprende ba malu, nune’e bele hetan informasaun ruma hosi instituisaun Governu sira, emprezáriu lokál, inklui feto sobrevivente sira.

Alende ne’e, sei aprezenta filme badak ho objetivu oinsá promove inkluzaun ekonomia no inkkuzaun sosiál, oinsá mak ita tau importánsia ba hakbiit ekonomia ba feto sobrevivente, fó oportunidade ba sira, nune’e bele hala’o negósiu inklui ema hotu, labele prátika diskriminasaun ba ema ho defisiénsia.

Nia fundamenta, grupu alvu ne’ebé hamahan-an iha ONG ACBIT, hanesan grupu alvu ba sobrevivente sira iha sub rejiaun Oésilo iha suku Bobometo, aldeia Tumin, iha sub-rejiaun Pante Makasar, suku Taiboko, aldeia Makelab, no iha suku Lalisuk, ne’ebe hetan apoiu fundu rotativu ho montante $1.500 atu halo atividade negósiu durante tinan ida.

Hosi fundu rotativu ne’e tinan oin grupu sobrevivente sira sei entrega ba ACBIT bele apoiu fali ba grupu seluk.

“Ami hanoin ida-ne’e importante tanba ne’e maka ita presiza hakbiit ekonomia feto atu nune’e bele sai independente nomoos bele halo atividade ba aan rasik, hala’o negósiu kiik no promove insiativa rasik, ho objetivu atu hetan rendimentu, tanba hosi fundu rotativu ne’e tinan oin grupu sobrevivente sira sei entrega ba ACBIT,” nia afirma

Prezidente Autoridade RAEOA, Arsénio Paixão Bano, ne’ebé abertura atividade ne’e orgullu tanba programa hakbiit inan feto sobrevivente ne’e di’ak tebes atu tulun inan feto-sira-ne’ebé iha tinan 1999 ne’ebé lakon sira-nia família.

“Ita tenke rekoñese buat barak konsege realiza no buat balun mós la konsege implementa maibé tenke esforsu aan nafatin no tenta beibeik, hanesan iha Atoni tenke servisu maka liu-liu inan feto sira atu utiliza apoiu hosi ONG ACBIT hodi bele ajuda nesesidade família nian,” nia fó hanoin.

Iha 2021 autoridade RAEOA liuhosi Gabinete Presidente Autoridade apoiu grupu feto hamutuk 34 ho orsamentu kuaze rihun $94, atu oinsá bele kria servisu ba an rasik, hodi responde nesesidade família nian.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here