Prezidente Repúblika, José Ramos-Horta, Enkontru ho Prezidente Repúblika, José Ramos-Horta, Enkontru ho CARE Internasionál. Prezidente Nicolau Lobato, Bairru Pite, kuarta (15/06. Imajen Tatoli /Egas Cristóvão

DILI, 15 juñu 2022 (TATOLI)— Prezidente Repúblika, José Ramos Horta, kuarta ne’e, halo audénsia ho Care Internasionál hodi indodús programa importante no prióridade hanesan programa nutrisaun no edukasaun ne’ebé implementa ona iha Timor-Leste.

Diretór Country Care Internasionál iha Timor-Leste, Peter Goodfellow.Imajen/TATOLI

“Ami nia enkontru ho Prezidente Repúblika atu introdús programa Care Internasionál nian iha área nutrisaun no edukasaun. Tanba ita hotu hatene nutrisaun no edukasaun importante ba Timor-Leste,” Diretór Country Care Internasionál iha Timor-Leste, Peter Goodfellow, hateten ba jornalista sira hafoin ramata enkontru ho PR Horta iha Palásiu Prezidensiál Bairru-Pité, kuarta ne’e.

Care Internasionál prioritiza programa edukasaun no nutrisaun inklui porgrama foun ida ho naran Lafaek tanba hetan fundu millaun $1 hosi Governu Nova Zelándia.

Alende ne’e, Care Internasionál mós hetan apoiu fundu hosi Estadu Unidu Amérika (EUA) millaun $5 atu apoiua Timor-Leste iha progama merenda eskolar liuliu nutrisaun no edukasaun.

“Care Internasionál sei implementa programa nutrisaun iha eskola sira liuliu apoia liuhosi programa merenda eskolar hodi suporta hahán ba eskola sira,” nia afirma.

Molok ne’e, Organizasaun Naun Govermentál (ONG) Care International hamutuk ho parseiru-sira implementa ona programa Hahán ne’ebé atu fó Tulun ho Nutrisaun no Edukasaun – Ai-han atu Hadi’a Nutrisaun no Edukasaun (HATUTAN), iha munisípiu Ermera, Likisá, Ainaro no Manatutu.

Care International kontinua implementa programa ne’e liuhosi fornesimentu fos, koto, mina atu estudante-sira bele hetan ai-han ho nutrisaun di’ak iha merenda eskolár.

Estimasaun hosi fundu ne’ebé iha la’ós ba de’it labarik-sira iha eskola 440 iha Munisípiu haat ne’e, maibé sei apoiu mós komunidade ne’ebé hela besik área eskola ne’ebé presija duni.

Implementasaun iha Munisípiu haat ne’e diferente ho Munisípiu-sira seluk, alende hetan fos, koto, mina no material-sira seluk, sira mós hetan apoiu orsamentu hosi Governu ba programa merenda eskolár.

Munisípiu sira seluk la hetan ai-han sira seluk,  maibé hetan de’it mak osan ne’ebé kada estudante loron ida 0,25 centavu.

Programa HATUTAN lansa ofisialmente iha loron 11 fulan-juñu 2019, ho objetivu atu hadi’a edukasaun, nutrisaun no saúde iha eskola hamutuk 440 no komunidade ne’ebé besik eskola sira-ne’e iha munisípiu Ermera, Likisá, Ainaro no Manatutu, liuhosi apoiu ba agrikultór-sira hodi hasa’e produsaun produtu lokál-sira, atu ho forma ida-ne’e bele hasa’e rendimentu agrikultór-sira nian no kria fonte sustentavel hosi ai-han sira ne’ebé iha nutrisaun, ba eskola lokál sira.

Programa ne’e mós sei tulun agrikultór-sira hodi sosa ekipamentu agríkola esensiál-sira no fornese asaun formasaun.

Programa ne’e nu’udar projetu ida ba tinan lima, ho valór osan besik millaun $ 26, ho finansiamentu hosi Departamentu Agrikultura Estadus Unidus Amérika-nian, liuhosi Programa Internasionál Alimentasaun no Edukasaun Infantíl McGovern-Dole, no implementa hosi Organizasaun Naun Govermentál (ONG) Care International, liuhosi parseira ho Ministériu Edukasaun, Juventude no Desportu, Ministériu Saúde, Ministériu Agrikultura no Peskas no ONG Mercy Corps ho Water Aid.

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here