ALFela sosializa asesu justisa formál ba kazu violénsia bazeia jéneru, ba komunidade postu Lacluta, munisípiu Viqueque, kuarta (15/06). Imajen Tatoli/Vitorino Lopes da Costa

VIQUEQUE, 15 juñu 2022 (TATOLI)–Organizasaun Naun Governmentál, Asisténsia Legál ba Feto no Labarik (ALFeLa), kuarta ne’e, halo sosializasaun kona-ba prosesu  asesu ba justisa formál no sistema referál ba kazu violénsia bazeia ba jéneru, ba komunidade hosi postu administrativu Lacluta, munisípiu Viqueque.

Koordenadór Advokasia no Prevensaun ALFeLa, Antoninho Marques,  hateten, asisténsia ne’e iha vizaun no misaun atu fó asisténsia legál ba feto no labarik sira hodi asesu ba sistema justisa formál ne’ebé justu no la iha diskriminasaun.

“Violénsia hasoru feto no labarik sai hanesan preokupasaun boot, tamba ne’e ita hotu iha ne’e ajuda malu prevene no luta hasoru violénsia hasoru feto no labarik, liuhosi programa spothlihgt ho inisiativa atu sosializa informasaun ba família, komunidade no sosiedade sira,” Koordenadór informa ba Agência Tatoli, iha postu administrativu Lacluta.

Notísia relevante: Uma Mahon Viqueque rejista kazu viólensia doméstika no sexuál 36

Atu   prevene  violénsia bazeia ba jéneru liuhosi relata kazu sira ba entidade relevante hodi fó apoiu ba vítima sira ne’ebé hasoru violénsia, tanba dala barak violénsia ne’e akontense hela iha sosiedade nia le’et, maibé la sensível ba situasaun ne’e.

Iha fatin hanesan, Administradór postu Lacluta, José Andrade dos Santos, apresia atividade ne’e tanba nu’udar oportunidade di’ak bele rona informasaun barak tanba komunidade iha baze menus liu informasaun no bele tulun komunidade bele koñese entidade sira ne’ebé mak serbisu defende direitu feto no labarik.

“Nune’e, akontese kazu ruma iha ita-nia komunidade, ita hatene ona oinsá atu refere kazu ne’e hodi husu tulun halo prevensaun ba violénsia hasoru feto no labarik, tamba ne’e nu’udar krime públiku,” nia tenik.

Membru Governu relevante hosi liña ministeriál, sosiedade sivil, komunidade, juventude, estudante,  veteranu, relijiozu no xefe suku sira hotu mai rona informasaun sira no tau atensaun másimu hodi  iha koñesimentu liga ho violénsia hasoru feto no labarik hodi bele halo prevensaun.

“Atu hamenus hahalok violénsia, komunidade bele moris hakmatek no harmonia. Ha’u husu ba parte hotu atu serbisu hamutuk hodi halakon baku malu, tuku malu no oho malu iha postu Administrativu Lacluta nia laran,” nia hameno.

Nune’e mós, Komandante Polísia Nasionál Timor-Leste (PNTL) Eskuadra Lacluta, Pedro F. Carvalho, relata, daudaun  postu Lacluta rejista  kazu ualu no kazu sira-ne’e Polísia aprezenta ona  ba Ministériu Públiku (MP) hodi hein nia prosesu kontinua.

“Iha tempu uluk violénsia doméstika sai hanesan problema família,  baibain ema dehan bikan kanuru mak tarutu, maibé agora ita-nia Parlamentu halo ona lei númeru 7/2010 kona-ba Lei Kontra Violénsia Doméstika, nune’e lei ne’e mosu ita konsidera violénsia doméstika hanesan krime públiku. Tanba ne’e, ita labele halakon kazu sira iha ita-nia le’et, maibe tenki hamate iha Tribunál no ita laiha kompeténsia atu hamate ,” nia informa.

Nia dehan, bainhira ema balun hamate kazu sira hanesan ne’e, nia sei kona prosesu krime ida hanaran krime la partisipasaun.

“Tanba ne’e, ami husu ita hotu ne’ebé partisipa iha atividade ne’e atu kopera hamutuk ho ami hodi levanta kazu ne’e ba oin hodi halakon violénsia hasoru feto no labarik feto iha ita-nia postu Lacluta,” nia fó hanoin.

Atividade ne’e realiza durante loron ida no hetan partisipa hosi  membru Governu relevante, sosiedade sivil, relijiozu, juventude, estudante no komunidade iha postu administrativu Lacluta, munisípiu Viqueque ho totál partisipante hamutuk 93, kompostu hosi feto 28 no mane 65.

Jornalista  : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here