Adjuntu Sekretáriu Jerál Interinu Federasaun Futeból Timor-Leste (FFTL) Frederico Martins

DILI, 15 juñu 2022 (TATOLI)– Adjuntu Sekretáriu Jerál Federasaun Futeból Timor-Leste (FFTL), Frederico Martins, informa jogadór selesaun nasionál U-16 sei ba halo Training Camp iha Korea Súl durante fulan ida hodi prepara aan ba artisipa iha jogu Asean Football Federation (AFF) ne’ebé realiza iha Indonézia, fulan jullu ne’e.

Tuir oráriu jogadór sira aranka bá Korea Súl  iha loron 24 juñu no kona-ba akomodasaun durante halo treinamentu iha Korea Súl sei fasilita hotu hosi FFTL no kampu ba treinamentu sei fasilita hosi federasaun futeból Korea nian.

“Ita nia jogadór selesaun nasionál U-16 agora preparadu hela atu ba halo Training Camp iha Korea súl ne’ebé akompaña hosi treinadór Mister Kim. Treinu ne’e atu halo preparasaun iha ne’ebá kuaze fulan ida, nune’e iha jullu sira bele mai fali partisipa iha kompetisaun AFF nian ne’ebé sei halao iha Jakarta-Indonezia,” Adjuntu Sekejn Frederico, hateten  ba Agência TATOLI iha edifisiu FFTL Dili, kuarta ne’e.

Jogadór ne’ebé atu arranka ba Korea Súl hamutuk na’in-22. Daudaun halo ona selesaun ba jogadór na’in-25 mak treinu hela no sei hamenus tan na’in-tolu atu kompleta na’in-22 de’it mak sei arranka. Jogadór sira sei arranka hamutuk ho treinadór prinsipál na’in-ida, asistente na’in rua no treinadór baliza na’in-ida.

Notísia relevante: FFTL hahú kontaktu PSSI hodi ekipa U-19 bá treinu iha Jakarta

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here