Ministru Transporte no Transporte, José Agustinho da Silva, hamutuk ho Xefe Ezekutivu Telkomcel, Benedictus Ardiyanto Pryo, asina kontratu ba projetu NCP VII, iha salaun MTK, Caicoli, tersa (14/06). Imajen Tatoli/ Antónia Gusmão

DILI, 14 juñu 2022 (TATOLI)--Governu liuhosi Ministériu Transporte no Komunikasaun (MTK) no empreza Telkomcel asina kontratu atu realiza National Connectivity Project VII (NCP), hodi alarga tan konetividade to’o postu administrativu.

“Bazeia ba rezultadu serbisu Komisaun Nasionál Aprovizionamentu (CAN, sigla portugés), empreza Telkomcel maka prienxe rekezitu téknika, administrativa, rejime legál, rejime jurídiku, no aprovizionamentu, nune’e tama ba faze formalizasaun asinatura, nune’e obra ida-ne’e bele la’o,” Ministru Transporte no Komunikasaun, José Agustinho da Silva, hateten, hafoin selebra kontratu iha salaun MTK, Caicoli, tersa ne’e.

Notísia relevante: Governu no empreza ASN selebra kontratu implementa projetu fibra ótika

Ministru Transporte no Transporte, José Agustinho da Silva, hamutuk ho Xefe Ezekutivu Telkomcel, Benedictus Ardiyanto Pryo, asina kontratu ba projetu NCP VII, iha salaun MTK, Caicoli, tersa (14/06). Imajen Tatoli/ Antónia Gusmão

Tuir Ministru, inisiativa ne’e mosu tanba setór telekomunikasaun iha Timor-Leste enfrenta problema sériu no sai preokupasaun públiku liga ho problema infraestrutura komunikasaun.

“Infraestrutura komunikasaun ne’e ita hahú hosi NCP I no agora tama ba NCP VII, hafoin infraestrutura ne’e estabelesidu ho kapasidade di’ak. NCP VII ne’e atu halo ligasaun ba iha ne’ebé, ita halo konesaun ba to’o edifísiu Governu iha postu sira ne’e, tanba NPC VI to’o munisípiu de’it agora ho NCP VII ne’e alarga tan,” nia akresenta.

Ho asinatura ne’e, empreza bele aselera ninia atividade hodi halo konesaun ba fatin sira ne’e no husu aselera projetu, nune’e molok tinan ne’e ramata tenki finaliza halo konesaun hotu ba parte sira ne’ebé atu liga bazeia ba kontratu.

“Ne’e aliña ho polítiku Governu hodi implementa Governu eletróniku, tanba infraestrutura ne’e importante, atu implementa polítika Governu dada fibra ótika mai karik ita-nia infraestrutura pelu menus iha ona,” nia tenik.

Orsamentu ba investimentu ne’e prevee iha Orsamentu Jerál Estadu (OJE) 2022 iha Fundu Infraestrutura hamutuk $2,6, ho durasaun ba kontratu ba tinan-ida.

Iha biban hanesan, Xefe Ezekutivu Telkomcel, Benedictus Ardiyanto Pryo, hateten, Telkomcel iha Timor-Leste hetan oportunidade hosi Governu liuhosi MTK, nune’e iha responsabiliade hodi bele halo projetu NCP VII iha tinan ida-ne’e.

“Orgullu tebes no agradese tanba ami bele fó atendimentu ba komunidade Timor-Leste liuhosi fiar ne’ebé Governu fó ami hodi hala’o projetu ne’e ho di’ak no espera konfiansa ne’e bele hala’o ho di’ak. Ami Telkomcel liuhuosi Telcom Group ho komprimisu hodi fó apoia no asisténsia ne’ebé di’ak liu, liuhosi projetu ida-ne’e no bele benefisia ba komunidade inklui Governu,” nia kompromete.

Maski nune’e, Telkomcel la halo mesak projetu ne’e, maibé hamutuk ho Sinergy ho Telcom Infra hodi bele oferese infraestutura no Telkomcel mak fasilita konetividade ba projetu.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here