MAECOM-RAEOA hametin kompromisu ba investimentu prodús magot dezenvolve pekuária. Imajen mídia ZEESM.

OÉ-CUSSE, 14 juñu 2022 (TATOLI) – Movimentu Asaun Ekonomia Komunitáriu (MAECOM, sigla ortugés), tersa ne’e enkontru ho Autoridade Rejiaun Administrativa Espesiál Oé-Cusse Ambeno (RAEOA), hodi hametin kompromisu diskute proposta investimentu integradu iha área pekuária nian.

Proposta investimentu integradu ba setór produtivu ho objetivu atu prodús Magot dezenvolve área pekuária ba animál tolu, hakiak ikan, fahi no manu iha rejiaun ne’e.

Prezidente MAECOM, Rui Castro, informa, enkontru ne’e hanesan kontinuasaun ho Prezidente Autoridade tanba antes ne’e parte rua selebra ona akordu atu realiza investimentu integradu ida iha rejiaun ne’e.

“Tanba investimentu ne’e integradu, hamutuk ho sosiedade komersiál sira iha ZEESM nia okos, no emprezáriu Oé-Cusse, ne’ebé semana oin tama ona detallu ba investimentu ne’e, ohin ami hahú fo’er sira iha merkadu, rezolve ho magnot, tanba ne’e hanesan ular nia proteína 40%, nia rezultadu sei fó-han manu, ikan, fahi, nune’e bele rezolve ona lixu, nomoos iha adubu órganiku bele fornese ba iha natar no toos, dezenvolve mós magnot, liga ba iha produsaun, atu hakiak animál sira-ne’e, kontinua to’o asesu ba merkadu,” Rui Castro, informa ba jornalista sira iha Gabinete ZEESM Oé-Cusse.

Emprezáriu Timor-oan ne’e, kompromete katak, kaléndariu ba implementasaun sei akontese iha tinan ne’e nia laran, tanba iha semana ne’e MAECOM sei haruka ekipa bussines plaining sei dezloka ba Oé-Cusse.

“Ekipa ne’e hosi MAECOM, sosiedade komersiál no emprezáriu Oé-Cusse, atu halo diskusaun kle’an detalladu ba tékniku, tarde liu iha agostu tinan ne’e, ita hahú faze implementasaun, signifika, servisu ki’ik sei hahú iha semana rua nia laran, tanba ami konsulta dala barak ona ho autoridade RAEOA,” nia katak.

Nia dehan, hahú uluk ho buat ne’ebé lalais liu entaun investimentu integradu ne’e 100% hala’o iha Oé-Cusse, tanba matéria-prima mai hosi lixu merkadu Numbei no fatin seluk, tanba MAECOM iha ona esperiénsia prodús Magot.

Nia informa, problema prinsipál setór produtivu iha Oé-Cusse kona-bá hakiak, problema iha alimentasaun, ema labele hakiak fahi barak tanba hahán importa hosi nasaun viziñu folin karun, nune’e mós ema labele hakiak ikan no manu halo barak, tanba hahán karun.

Entaun investimentu ne’e primeiru presiza rezolve uluk hahán, ida-ne’ebé ninia baze ne’e uza duni produtu lokál iha Oé-Cusse, hanesan lixu sira-ne’ebé merkadu iha, restaurante no ospitál ba órgainku, iha uma no balu soe iha tasi-ibun bele uza transforma ba hahán.

Prezidente Kámara Komérsiu no Indústria (CCI, sigla portugés) RAEOA, Eurico da Rosa, orgullu ho kooperasaun ho MAECOM, bele dezenvolve ona setór pekuáriu nian, kona-bá hakiak ikan, manu no fahi nune’e bele asesu ba merkadu.

“Aprezentasaun ohin hosi MAECOM interesante tebes, orgullu tanba RAEOA komesa hahú ona haree oinsá halo investimentu, oinsá atu hakiak magot nia benefisíu boot ba animál ikan, manu no fahi inklui agrikultór sira, entaun ne’e fó rezolve ona problema Oé-Cusse durante ne’e atu hetan alimentasaun, tanba ita uza alimentasaun fábrika mai hosi fronteira, entaun ne’e problema barak, embora prosesu importasaun no problema mós folin,” nia orgullu.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan