Ministru Administrasaun Estatál, Miguel Pereira de Carvalho. Imajen TATOLI/Egas Cristovão.

DILI, 14 juñu 2022 (TATOLI)—Governu liuhosi Ministériu Administrasaun Estatál (MAE) inisia ona hodi halo alterasaun ba lei eleisaun parlamentár no tempu badak sei submete ba Konsellu Ministru hodi halo diskusaun.

Notísia Relevante: MAE sei aprezenta proposta-lei eleisaun parlamentár ba Konsellu Ministru

Ministru Administrasaun Estatál (MAE), Miguel Pereira de Carvalho, hateten iha altersaun ne’e MAE sei propoin pontu tolu (3) ba iha lei eleisaun parlamentár atu halo armonizasaun ho lei eleisaun prezidensiál no husu kontinua estebelese sentru votasaun paralelu iha Dili.

“Iha altersaun lei ne’e, dahuluk ita halo atu garante lei eleisaun parlamentár no armonia ho lei eleisaun prezidensiál. Daruak, kontinua estabelese sentru votasaun paralelu ne’ebé garante ita-nia populasaun ne’ebé mak iha munisípiu sira ne’ebé hela iha Dili bele vota de’it iha Dili. Terseiru, funsionamentu sentru votasaun tanba lei atuál agora sentru votasaun sira inisia ho tuku 07h00 maibé MAE propoin atu hahú iha tuku 06h00 no votasaun hahú tuku 07h00 dadeer,” Miguel Pereira de Carvalho hateten ba Agência TATOLI, hafoin partisipa asina nota entendeimentu ho KFP, INAP, PUND, iha Delta Nova, Dili segunda ne’e.

Nia esplika, ida-ne’e hanesan sujeitu ba rejistu tanba iha proposta-lei ne’e mak Ministériu Administrasaun Estatál (MAE) sei hadi’a, nune’e bainhira rejistu karik labale iha komplikadu no populasaun sira bele prepara no hakbesik an ba sentru votasaun sira ne’ebé Governu estabelese hodi ezerse sira-nia direitu votu.

“Proposta alterasaun hirak-ne’e mak ita introdús iha ne’ebá, maibé sei halo diskusaun depois mak submete ba Konsellu Ministru,” governante ne’e hateten.

Entretantu, Sentru Votasaun Paralelu sei estabelese de’it iha Dili tanba populasaun maiória hosi munisípiu mai Dili buka moris no halo no negósiu inklui estudante sira.

“Ida-ne’e, ita fasilita sira atu vota iha Dili no la presiza ba munisípiu sira. Maibé ne’e ita sei propoin ba lei alterasaun parlamentár,” nia dehan.

MAE mós esplika, lei eleisaun parlamentár diferensa ho lei partidu polítiku tanba lei partidu polítiku ko’alia de’it ba partidu polítiku nian no lei eleisaun parlamentár ko’alia de’it kona-ba oinsá eleitór hili deputadu sira.

Notísia Relevante: Eleisaun parlamentar 2023, Governu hahú halo preparasaun ba atualizasaun baze dadus

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here