Ekipa River Bulobu uza farda mutin kahur matak tenta hadau bola hosi ekipa Madiran uza farda kinur kahur metan. Imajen Tatoli/Sérgio da Cruz.

BOBONARO, 14 juñu 2022 (TATOLI) – Kompetisaun jogu futeból sub-23 époka 2022 faze kuarta-finál ne’ebé realiza iha kampu futeból Maliana, ekipa Madiran ‘oho’ River Bulobu ho rezultadu 6-0 no sei kontra klubu Sobo-Ai iha finál.

Ho derrota ne’ebé River Bulobu enfrenta halo Madiran hakat ba finál. Maibé Madiran mós hatene hela Sobo-Ai nia forsa, tanba durante ne’e mós tebe-sai ona klubu jigante iha kapitál Maliana, Maliana United. Foin lalais ne’e Sobo-Ai mós konsege ‘oho’ tán Ex Kodim.

Nune’e Madiran labele konsidera klubu Sobo-Ai ne’ebé mai hosi suku Oe-Leu ne’e fásil hanesan River Bulobu, tanba treinadór Vitorino Gusmão deklara ona katak iha klubu sira iha kapitál Maliana gava-aan demais liu no remekan klubu ne’ebé mai hosi foho ne’e. Rezultadu mak sei hatudu iha kampu batalla alias kampu futeból Maliana mak sai sasin.

Nune’e mós Sobo-ai nia loron deskansa barak kompara ho Madiran, maibé bola-kabuar no depende ba estratéjia no tátika hosi treinadór idak-idak nian.

Oras ne’e bola-mania, liuliu ba joven, ferik no katuas sira iha kapitál Maliana ne’ebé gosta fubeból iha ona imajinasaun ‘sé mak sei hiit’ troféu sub-23 ne’ebé faze finál sei realiza iha loron-sábadu, 18 maiu, tuku 04:00 lokraik iha kampu futeból Maliana.

Notisia Relevante:Jogu sub-23 iha Maliana, Klubu Sobo-ai hakat ba finál

Jogu primeira parte

Iha menutu dahuluk, ekipa rua lansa kedas kontra no atake ho forsa no tátika idak-idak nian, maibé iha menutu lima, ekipa Madiran domina kedas bola tanba halimar bola-ain ba ain barak iha liña klaran no River Bulobu nonok ho defensiva.

Jogu kontinua lao iha menutu 10, ambiente kampu bokon oituan tanba udan halo ekipa Madiran loke kedas bola-aas ba liña oin, maibé defeze River Bulobu la fó fatin, hakfodak bola barullu hosi parte liña kotuk, aproveita kedas hosi Defeza Ronaldo Amarál (25) konsege fura uluk rede River Bulobu iha menute 30 liuhosi sutu livre hodi muda rezultadu ba 1-0.

Jogu segunda parte

Ho rezultadu ne’e halo Madiran badinas buka bola halo jogu bonitu liután hodi soe bola barak ba oin atu prodús tán golu ruma, maibé ambisaun ne’e la konsege tanba laiha rezultadu to’o termina primeira parte.

Hakat ba segunda parte, ekipa rua nafatin lansa kontra no atake, klubu River Bulobu  muda sira-nia jogu modelu ofensiva tanba mai  ho ambisaun hakarak tama ba finál, maibé Madiran konsege hamate sira-nia jogu tanba klube River Bulobu mesak otas nurak de’it.

Haree ba ekipa juveníl sira-nia esperiénsia hahú menus, Madiran aproveita didi’ak lansa ameasa barak ba oin atu dudu tán rezutadu ba leten, ikus mai mehi ne’e la konsege hela de’it ho mehi tanba iha menutu 63, kpitaun ekipa Ronaldo Amaral (25) susesu lees tán golu ida hodi muda rezultadu ba 2-0.

Ho golu ne’e mak halo Madiran FC manas liután tanba hetan apoia maka’as hosi adeptu sira, nune’e avansadu Vladimiro Santos Amarál (11) purada tán golu ida liuhosi bola kabesada hodi aumenta rezultadu ba 3-0.

Ho golu ne’e halo ekipa estimada ho naran ‘Rotunda Maliana’ ne’e hafuhu tán River Bulobu nia fallansu ikus mai iha menutu 74, Valdimiro hetan tán sorte di’ak fura golu ida hodi hasa’e rezultadu ba 4-0.

Rezultadu ne’e halo espíritu no forsa  ekipa juveníl ne’e mihis liután, tanba Madrian FC ameasa beibeik ba guarda-rede, nune’e jogadór Marcelino (9) susesu fura tán golu ida hodi hasa’e tán sira-nia golu ba 5-0.

Nune’e River Bulobu koko hasa’e tán ritmu jogu atu responde golu ruma, maibé duni la toman tanba liña kotuk Madiran FC sira soke labele, nune’e jogu kontinua la’o, Madrian hetan bola barak loos, pasa ba mai ho halimar de’it ona, hakfodak bola trankadu ida hosi karuk mai monu iha baliza oin, aproveita kedas hosi jogadór Fabrizio (30) susesu kolleta tán golu ida hodi dudu sa’e tán rezultadu ba 6-0. Rezultadu ne’e mantein termina segunda parte.

Jogu ne’e lidera hosi árbitru Lucas Feliz, asistente primeiru Mateus Marques da Cruz ‘Atau’, asistente segundu Julito ‘Alito’ no árbitru suplente Domingos Vicente ‘Juragan.

Notisia Relevante:Jogu sub-23, Ex Kodim manán Maliana United 8-6

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here