Prezidente Autoridade Munisípiu Bobonaro, Ernesto de Oliveira Barreto. Imajen Tatoli/Sérgio da Cruz.

BOBONARO, 14 juñu 2022 (TATOLI) Autoridade Munisipál Bobonaro lideradu Ernesto de Oliveira Barreto, hatama ona planu reativa merkadu Mau-Mali iha Planu Dezenvolvimentu Integradu Munisipál (PDIM) iha orsamentu tinan fiskál 2023 nune’e aumenta fasilidade iha merkadu refere.

Autoridade Munisípiu Bobonaro tau prioridade sei reativa uluk merkadu Mau-Mali, ne’ebé lokaliza iha aldeia Samelaun, suku Ritabou, postu administrativu Maliana ne’ebé negosiante sira abandona tinan ida ona.

Prezidente Autoridade Munisipiu Bobonaro, Ernesto de Oliveira Barreto, hateten planu reativa merkadu ne’e liuhosi diskusaun naruk ida entre membru Konsellu Koordenasaun Munisipál (CCM, sigla portugés) iha loron (09/06) maka propoin ona iha PDIM ba Osamentu Jerál Estadu (OJE) tinan fiskál 2023 katak sei aumenta fasilidade bázika sira-ne’ebé seidauk iha.

Notisia Relevante:Negosiante Maliana husu tetu didi’ak bazár movel iha merkadu Mau-Mali no Soso

Ernesto subliña, molok ne’e autoridade munisípiu realiza enkontru ho entidade hotu uza maneira atubele mobiliza negosiante sira iha merkadu sentrál Maliana ba bazár movél iha Merkadu Mau-Mali no Soso, maibé haree kondisaun atuál merkadu Soso seidauk bele funsiona tanba laiha bee-moos inklui fasilidade bázika seluk la funsiona.

“Ami sei reaativa uluk mak merkadu Mau-Mali, ne’e la’ós reabilita, maibé aumenta fasilidade, depois karik orsamentu ne’e to’o sei konstrui mós moru, atubele seguru, agora markadu Soso ita sei labale ko’alia tanba orsamentu lato’o,” nia informa ba jornalista sira, iha kna’ar-fatin, Maliana.

Kona-bá bainhira mak atu reativa hikas merkadu ne’e, Prezidente ne’e seidauk fiksa tanba foin prepara proposta atu submete Ministériu Administrasaun Estatál lori ba diskute iha Parlamentu Nasionál hodi hetan aprovasaun.

Prezidente Autoridade ne’e akresenta, prioridade uluk mak merkadu Mau-Mali ho baze ba proposta ne’ebé aprezenta hosi Diretór Delegasaun Territoriál Transporte Terrestre, José Paulo Henriques Baptista, katak iha tinan hirak liubá terra no popriedade entrega ona rai mamuk ba Diresaun Nasionál  (DNTT) atu establaese terminál iha área Mole-Anan, suku Ritabou.

Tanba Mole-Anan sai sentru ba postu administrativu Maliana, Cailaco, Atabae no Balibo, ne’ebé ninia liña konetividade transporte públiku hosi Maliana bele ba Ermera, Liquiçá no Dili.

“Fatin ne’e mo sai sentru atu komunidade sira bele mobiliza sira-nia rekursu potensiál sira ba iha merkadu Mau-Mali, tanba karreta hotu sei tama iha-ne’ebá entaun negosiante sira bele hetan rendimentu di’ak,” nia katak.

Merkadu Mau-Mali ne’ebé autoridade Bobonaro planu atu reativa ne’e governu anteriór konstrui iha tinan 2019, maibé negosiante sira abandona kuaze tinan ida ona tanba akontese kazu ofensa integridade agravadu ne’ebé hamate Custódio Fatíma iha fulan-juñu tinan 2021 liubá.

Notisia Relevante:Parte hotu hetan rendimentu bainhira reativa merkadu rua iha Maliana

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here