Ilustrasaun Sistema E-learning hodi kapasita funsionáriu públiku. Imajen/Espesiál.

DILI, 13 juñu 2022 (TATOLI)—Prezidente Komisaun Funsaun Públika (CFP-sigla portugés), Faustino Cardoso, hateten sistema E-learning hanesan modalidade foun ida ba funsionáriu sira atu konkista di’ak liután sira-nia karreira.

“Sistema E-learning ne’e modalidade foun ida atu aplika iha ámbitu funsaun públika ho nia objetivu atu fó biban ba funsionáriu sira atu konkista liután sira-nia karreira iha futuru,” Prezidente KFP, ba jornalista sira, hafoin asina nota entendimentu entre projetu rua ne’ebé mak implementadu husi Programa Dezenvolvimentu Nasaun Unida (UNDP), kona-ba E-learning ne’ebé sei fó funsionáriu sira, iha Delta Nova, Dili segunda ne’e.

Tanba, tuir nia, kandidatu ba promosaun mak aspetu ka sasukat ida ba abilitasaun literária maibé bainhira abilitasaun literária aas mak klaru di’akliu mak fó konkista ba nia atu tuir promosaun ba nia karreira.

Nune’e, liuhosi programa E-learning ne’e bele aumenta sira-nia koñesimentu no hasa’e kapasidade funsionáriu sira-nian iha nível munisípiu liuhosi formasaun online hodi bele konkista liután sira-nia karreira no bele kompete iha promosaun ne’ebé KFP fó sai.

Aleinde ne’e, nia hateten, atu hasa’e liután funsionáriu públiku sira-nia koñesimentu iha ámbitu kapasitasaun iha nasionál no nível Munisípiu.

Ministru Administrasaun Estatál (MAE), Miguel Pereira de Carvalho, hateten E-learning mós halo parte ba Administrasaun Lokál iha munisípiu sira atu bele prepra ba funsaun poder lokál nian.

“E-learning ne’e ita fó kapasitasaun ba funsionáriu sira-ne’ebé servisu iha administrasaun lokál Estadu sira iha munisípiu hodi prepara ba nune’e aban bainrua funsionáriu sira-ne’e iha ona kapasidade atu bele hala’o funsaun poder lokál sira,” nia dehan.

Ohin, nia dehan, asina akordu atu servisu hamutuk ho UNDP ne’e atu fó formasaun online ba funsionáriu iha munisípiu, tanba tuir dadus Estatístika hatudu katak funsionáriu iha munisípiu ne’ebé tuir formasaun ne’e hosi rezultadu avaliasaun só 10% mak bele tuir formasaun no 90% prátikamente lae.

“Entaun, ita hakarak fó formasaun barak liu funsionáriu iha nível lokál. Tanba formasaun online ne’e mós sei kontribui ba sira-nia karreira no iha prova para hasa’e sira-nia grau,” nia esplika.

Inisiativa ne’e maihosi apoiu konjunta entre projetu rua ne’ebé implementa hosi UNDP liuhosi projetu “Hametin Dezenvolvimentu Lokál Integradu liuhusi Harií Kapasidade Autoridade Munisipal iha Timor-Leste” no projetu “Salvaguarda komunidade Rurál no sira-nia riku soin hosi dezastre kauza hosi mudansa klimatika”.

Nune’e mós, fundu hosi GCF CFP no Institutu Nasionál Administrasaun Públika (INAP) mak sei sai hanesan na’in ba Plataforma E-learning ne’ebé mak estabelesidu hamutuk entre Coursera, nu’udar fornesidór kursu online nian no Institute of Business (IOB).

UNDP sei apoiu KFP no INAP atu harii sira-nia kapasidade atu organiza rasik E-learning ne’e iha futuru. Plataforma ne’e sei inklui pelumenus módulu formasaun 32 inklui jestaun finansa públika, informasaun, komunikasaun no teknolójia, integrasaun jéneru, infraestrutura eskala-kiik ba klimátika, jestaun projetu no sistema informasaun jeográfiku.

Reprezentante Rezidente UNDP iha Timor-Leste, Munkhtuya Antagerel, hateten kontente tanba bele asina nota entendimentu ho KFP, INAP hodi realiza E-learning ne’e ba funsionáriu sira iha munisípiu.

“Ami kontente tanba ohin ami bele asina akordu ho KFP ho INAP no mós asina kontratu ho IOB oinsá, atu haree ba plataforma E-learning ba funsionáriu iha munisípiu,” nia dehan.

Osan ba projetu rua ne’e mak hamutuk millaun $3,9 hosi Uniaun Europeia no hosi UNDP maibé partikularmente ba formasaun ida-ne’e.

Programa ne’e kontinuasaun tanba implementa ona iha tinan rua liubá iha munisípiu sira no ema ne’ebé tuir kuaze rihun ona.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here