Sekretariu Estadu Komunikasaun Sosial, Mericio Akara wainhira kualia iha kampaíña nasionál kombate hoax iha Golgota Mall. .Imajen Tatoli/Antonio Goncalves

DILI, 13 juñu 2022 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos reis ‘Akara’, hateten bainhira la kuidadu ba informasaun Hoax ka lia-falsu iha mídia sosiál mak Hoax ne’e bele destroi sosiedade, ambiente hakmatek no bele destroi nasaun Timor-Leste.

Notísia Relevante: SEKOMS-FHT diskute programa kombate hoax-promove internet saudavel

“Hoax ka lia falsu se ita la kuidadu, bele destroi ita-nia soseidade, bele destroi ita-nia ambiente hakmatek no bele destroi ita-nia nasaun. Tanba, ema ida parese ho intensaun ka dala ruma balun ho inosente, nia lansa de’it hoax ka lia-falsu no nia la hatene katak nia impaktu bele sai boot,” Merício Juvinal dos reis ‘Akara’ hateten lia hirak ne’e, iha lansamentu ba programa Literasia Dijitál dahuluk ba Estudante Secundáriu Paulo VI, Díli, segunda ne’e.

Hoax ne’e bele mós hakanek ema-nia sentimentu no hamihis ema-nia konfiansa ba malu, maske loro-loron ema bele haree malu di’ak maibé bainhira lansa hoax hodi hatun ida seluk hodi moris la hakmatek.

Nune’e, daudaun ne’e Estadu no Governu preukupa ho informasaun hoax ne’e tanba Governu nia intensaun tenke kria ambiente ida hakmatek, unidade, pás no estabilidade atu nune’e dezenvolvimentu bele la’o, tanba hosi dezenvolve ema-nia konfiansa no fiar ba malu, atu fó tempu ba malu hodi dezenvolve Timor-Leste ba oin.

Tuir nia, lia-falsu ne’e hola parte hosi sivilizasaun ida, pozitivu no negativu ne’e depende ba pensamentu, depende ba saida mak kuda iha ema ida-nia kakutak. Se so’e lia-falsu hodi ataka no deskonfia malu de’it, la espera iha tinan lima (5) no 10 mai, sei kria jerasaun ida-ne’ebé moris ho lia-falsu no ida-ne’e la di’ak ba Timor-Leste nia sivilizasaun.

Tanba ne’e, matéria ohin ne’e la’ós aumenta koñesimentu maibé ne’e tenke integradu ona iha matéria kona-ba edukasaun sivika. Tanba, liga ba pensamentu no dezenvolve karáter ho informasaun loos, kredivel, edukativu, inspira no motiva, joven sira atu halo planu ida-ne’ebé di’ak.

“Entaun ho materia hanesan ne’e, ita hakarak halo programa ne’e hahú hosi eskola, tanba tuir avaliasaun, ema uza mídia sosiál barak agora mak joven sira, tanba sira kaer telefone ida simcard rua no tolu. Aleinde ne’e, tuir dadus, ita-nia sidadaun foin tokon ida resin, maibé ema uza internet ka simcard barak liu kuaze liu tokon ida no besik tokon rua,” nia informa.

Se ema tokon ida mak kaer telefone uza simcard tolu ne’e, hanesan ema tokon tolu mak asesu ona internet, iha Timor ida ne’e mak agora akontese.

“Se uza ba buat di’ak, ne’e di’ak ba ita-nia sibilizasaun. Maibé uza loro-loron ba trata malu entaun meiu komunikasaun pozitivu bele sai ameasa fali ba ita. Entaun, Governu, nia pozisaun ita sei la blokeia no sei la bandu meiu komunikasaun, tanba ne’e hola parte hosi kultura foun mundu nian ne’ebé nasaun hotu utiliza. Se ita la utiliza handphone, ne’e ita ketinggalan zaman,” Governante ne’e hateten.

Notísia Relevante: SEKOMS lansa kampaña nasionál kombate hoax faze datoluk ba nivel munisípiu

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here