DILI, 13 juñu 2022 (TATOLI)— Sekretáriu Estadu Juventude no Desportu (SEJD), Abrão Saldanha “Nokosiku”, rejeita informasaun ne’ebé espalla iha públiku katak gasta orsamentu $40.000 hodi halo preparasaun ba simu vizita troféu kopa mundiál mai Timor-Leste.
“Troféu ne’e la’ós nasaun hotu-hotu mak hetan oportunidade tanba ita haree Indonézia no Malázia rasik seidauk hetan oportunidade ida ne’e, ita halo preparasaun hodi simu ne’e osan ita hasai hamutuk $22.000, la’ós hanesan iha média sira balun públika sai ne’e dehan $40.000” Abrão ba Jornalista-sira iha edifísiu Ministériu Justisa Dili, segunda ne’e.
Troféu Mundiál konsege to’o iha Timor – Leste iha tuku 09:30 no vizita Palásiu Prezidensiál Bairru-Pité no hakat liu ba Estádiu Munisipál Dili. Iha-ne’ebé troféu ne’e rai iha Dili durante oras hitu.
Orsamentu $22.000 ne’e, Governante ne’e esplika, Governu foti ka hasai hosi transferénsia públika SEJD nian mak gasta ba preparasaun liuliu selu artista sira ne’ebé kanta anima vizita troféu iha Estádiu munisipál Dili, hahán ba ema sira ba asiste seremonia ne’e, bee hemu, palku ne’ebé utiliza no buat seluk tan.
Maibé, hosi total orsamentu ne’e balun hosi kompañia internasionál Cocacola liuliu halo empresaun ba banner ne’ebé tau iha dalan-dalan no buat seluk tan.
Nune’e, SEJD husu ba públiku atu labele rona lia-anin katak governu gasta osan too $40.000-resin. Tanba objetivu Troféu mundiál vizita Timor-Leste ne’e atu hamorin Timór nia-naran no motiva joven desportiva sira hodi esforsu kompete iha futeból internasionál.
Vizita Troféu Mundiál koloka TL iha mapeamentu futeból
Prezidente Repúblika, José Manuel Ramos Horta, konsidera vizita Troféu Mundiál iha loron-ábadu ne’e, hahú koloka Timor-Leste iha mapeamentu futeból mundiál.
“Loron ohin di’ak tebes ba Timor – Leste, la’ós ba de’it futeból maibé ba povu Timor – Leste tomak, tau Timor-Leste dala ida tán iha mapa liuhosi diplomásia futeból nian, desportu bele lori pás no dame ba ema hotu,” Xefe estadu ko’alia hafoin kaer tiha troféu mundiál ne’e.
Ho nune’e, Xefe Estadu nia fó parabéns ba Federasaun Futeból Timor – Leste (FFTL) ne’ebé halo diplomasia di’ak tebes iha futeból ohin loron troféu mundiál ne’e bele to’o mai Timor – Leste atu ema hotu iha nasaun ne’e bele haree rasik ho matan.
Nasaun lima-nulu mak husu atu troféu ne’e ba vizita maibé FIFA hili liu Timor – Leste atu mai vizita, parabéns ba FFTL tanba halo diplomasia ida-ne’ebé di’ak tebes,” nia dehan.
Troféu ne’e importante tebes bainhira vizita nasaun ida só Prezidente Repúblika de’it mak bele kaer no ema hotu só bele hasai de’it fotografia.
Futebolista Franseza ne’ebé mak lori ekipa nasionál França susesu sai kampeaun iha Kopa Mundiál 1998, Christian Karembeu haktuir, vizita troféu Kopa Mundiál mai Timor-Leste ne’e tanba inisiativa hosi autoridade FFTL, ne’ebé mak la’ós de’it atu fó haksolok ba bola-mania sira hotu iha Timor-Leste, maibé ho vizita troféu ne’e mós atu inspira Timor-oan sira.
Troféu mundiál ne’e halo hosi osan-mean ho todan kilograma 6,142, naruk sentímetru 36,8. Troféu ne’e hanesan prémiu ne’ebé aas-liu iha mundu futeból.
Trofóu ne’e halo primeiru iha tinan 1930, iha tempu prezidente FIFA, Jules Rimet hodi halo prémiu ida ba eventu futeból nian. Enkuantu nasaun ne’ebé manán daluluk iha tinan 1930, hosi Urugay iha kontinente Amérika Latina. Enkuantu Brazil mak nasaun ne’ebé sai kampiaun barak-liu ba troféu mundiál ne’e.
Jornalista : Hortencio Sanchez
Editór : Florencio Miranda Ximenes
Benefisiu husi trofiu mai Timor ne mak saida?
Nusa 22.000 ne lori ba ajuda kbiit laek sr ou lori ba ajuda panti asuhan sira ka hlo buat nebe mak iha valor ba ita. Ba gasta fali osan boot da ne hodi soe deit ba trofiu ida be mai la to loron ida depois benefisiu mai ita laiha.
Ita so manan foto ho naran deit mas nia income husi ida trofiu ne laiha. Se karik atu atrai joven sira hodi dezenvolve sira nia talentu iha area football entaun nusa la uja osan ne hodi loke liga boot ida ho hadiah nebe boot par atrai sira hodi dezenvolve sira nia talentu. Desijaun sem politika publika nia rejultado mk hanesan ne.