Vigáriu Jerál Dioseze Maliana, Padre Lúcio Norberto de Deus. Imajen Tatoli/Sérgio da Cruz.

BOBONARO, 13 juñu 2022 (TATOLI) – Polísia Nasionál Timor-Leste (PNTL) hosi komandu munisípiu Bobonaro, hamutuk ho sarani parókia Balibo, segunda ne’e, selebra loron Santu António de Padua nu’udar padrueiru liuhosi misa agardesimentu iha Igreja Santu Antonio Balibo.

Vigáriu Jerál Dioseze Maliana, Padre Lúcio Norberto de Deus, husu ba sarani sra iha parókia Balibo no membru PNTL munisípiu Bobonaro atu pasiénsia banati-tuir Santu António tanba nu’udar santu ne’ebé hatudu-aan naroman ba ema-hotu ne’ebé lakon esperansa iha situasaun saida de’it.

Estátua Santu António de Padua iha Igreja parókia Balibo, munisípiu Bobonaro. Imajen Tatoli/Sergio da Cruz.

“Santu António hanesan santu eperansa, ne’e duni husu ba sarani Balibo no PNTL sira atu tau imi-nia laran metin ba nia, tanba santu ida-ne’e ema barak halo devosaun ba nia hodi buka buat-ne’ebé lakon, labele haluha husu tulun ba Santu António, hodi tulun imi iha kna’ar loron-loron, liuliu ba polísia sira,” Amu-lulik esplika iha nia omília.

Iha ámbitu ne’e amu selebrante ne’e mós fó pose ba membru konsellu parokiál Balibo kuaze na’in-20, bazea ba despaxu hosi Bispu Dioseze Maliana, Don Norberto do Amarál, númeru 14/2022 11 junu 2022, hodi serbí no haklaken nai Maromak nia liafuan ba sarani sira iha parókia ne’e.

Nune’e amu-lulik ne’e husu membru konsellu parokiál ne’ebé hetan fiar hosi Don Norberto, atu nafatin banati lala’ok Santu Antonio nian hanesan vertude ida mai ho ninia hahalok sira hanesan, kariedade, haraik-aan pasiénsia no laran mós ba ema-ne’ebé presiza tulun.

Sarani parokia Balibo hamutuk ho membru PNTL munisipiu Bobonaro lori hela ofertóriu ba altár Igreja parókia Santu António Balibo. Imajen Tatoli/Sérgio da Cruz.

Padre ne’e husu sarani sira tenke iha obrigasaun banati-tuir lala’ok santu nian hodi sai testemuña ba-aan rasik ho idak-idak nia kapasidade, estatutu sosiál hodi fó roman ba-aan rasik no ema hotu iha moris kada loron tuir buat-ne’ebé nai Maromak haruka.

“Tuir evanjellu ohin dehan ema la sunu ahi-oan iha kama okos, nia naroman la sai, maibé tau iha fatin ne’ebé aas hodi leno atu nia naroman ne’e namkari leno kintu-kantu oan sira-ne’e hotu, entaun liuhosi ita-nia testemuña mak halo ema seluk sei hetan maroman hodi moris haksolok rohan laek ninian,” nia hateten.

Komandante PNTL Munisípiu Bobonaro, Superintendente Antoninho Mauluta, orgulu hili ona Santu António nudar padrueiru PNTL nian hodi fó mahon no proteje membru iha kna’ar loron-loron.

Sarani parókia Balibo partisipa misa agradesimentu ba loron Santo Antonio de padua. Imajen Tatoli/Sérgio da Cruz.

Nia husu membru sira atu babanti-tuir lala’ok Santu António nian atubele obedese ba instituisaun, badinas no pasiénsia hodi serbí komunidade tomak tuir lema ne’ebé hili ona katak ‘hamutuk ho santu António ita sai belun ba ema hotu’.

“Ita ema moris tenke iha prinsípiu katak, ha’u moris tuir ha’u bele, la’ós ha’u moris tuir ha’u-nia hakarak. Sé ita moris tuir ita-nia hakarak to’o tempu ida ita sei hakat sala dalan, tanba ita hakarak saida maka ema iha, ha’u mos tenke iha, maibé moris tuir ha’u-nia bele, saida mak nia iha, tanba nia bele, saida mak hau laiha, tanba hau laiha,” nia dehan.

Misa agradesimentu ne’e partisipa hosi Sekretáriu Autoridade munisípiu Bobonaro, João Fátima do Carmo, eis deputadu balun, membru PNTL munisípiu Bobonaro kompostu hosi Unidade Patrullamentu Fronteira (UPF), Batallaun Orden Públika (BOP) no FALINTIL-Forsa Defeza Timor-Leste (F-FDTL), Bombeiru no Sarani parókia Balibo.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here