Negosiante faan dosi iha Motael. Imajen Tatoli/Nelia Fernandes.

DILI, 13 junu 2022 (TATOLI)—Negosiante ne’ebé halo atividade negósiu sona dosi preukupa ho folin sasán nesesidade bázika liu-liu trigu no mina-tein ne’ebé sa’e makaas iha merkadu, afeta ba atividade negosiante sira-ne’ebé faan dosi susar atu hetan rendimentu.

“Ami preukupa ho sasán nia folin ne’ebé agora sa’e iha merkadu, liu-liu trigu no mina-tein. Tanba, ami-nia nesesidade loro-loron agora sa’e hanesan ne’e, kuitadu, baa mi sira-ne’ebé halo atividade negósiu hanesan halo pisang goreng, nasi kuning no sate sira-ne’e susar tebes,” Negosiante faan dosi, Angelina Maia, hateten ba Agência Tatoli, iha Motael, Dili, segunda ne’e.

Sasán folin sa’e, liu-liu mina-tein ne’ebé antes ne’e jerigen litru lima nian ho folin $5 ne’e agora sa’e makaas to’o hetan $14.

“Hosi sasán nia folin sa’e, ami-nia rendimentu antes hetan 50% agora tun ba 10%. Maibé, ami kontinua halo negósiu tanba ami-nia nesesidade loro-loron no mós ba oan sira-nia presiza. Tuir lolos ami la presiza tanba gasta tempu de’it,” nia dehan.

Tanba ne’e, nia husu ba Governu bele halo kontrolu ba sasán nesesidade bázika nia folin no se bele fó subsídiu ba loja sira, tanba povu baibain hola sasán ne’e nia folin tenke estandar nafatin, se folin sa’e entaun Governu mak tenke kontrola.

Diretór Loja Starking, Caysiu Lting, hateten folin sasán sa’e la’ós iha Timor-Leste de’it maibé iha mundu tanba impaktu makaas hosi pandemia COVID-19 no mós funu entre Ukraina no Rusia, ne’ebé halo sasán folin sa’e inklui mina-tein no trigu.

“Impaktu mai ita timor mak rá-ahi tama mai iha Timor uluk haat, maibé agora hela Meratus de’it, entaun ho ida-ne’e ró mós folin sa’e la para. Hanesan, dahuluk $700 kada kontentór ida, agora sa’e ba $900 kada kontentór ida, hafoin sa’e ba $1.250. Nune’e, foin semana rua liubá sa’e tan ba $1.500 kada kontentór. Ida-ne’e fó impaktu ba sasán nesesidade bázika nia folin sa’e,” nia informa.

Aleinde ne’e, nia informa, sasán nesesidade bázika ne’ebé Loja Starking importa ne’e mai hosi nasaun Malázia no Indonézia ho folin sa’e tuir folin impoprtasaun ne’e.

“Uluk, trigu kilograma 25 ne’e kada saka ida ita faan $14 maibé agora sa’e $17, 25. Trigu sa’e makaas tanba impaktu hosi folin mina originál, tanba mina uluk ita faan kaixa ida 25 liter $20, maibé agora sa’e ba $40 no sasan seluk mós sae hotu,” nia dehan.

Ho sasan folin sa’e, halo konsumid siraór mai sosa menus, kompara ho tempu uluk, sasán hotu sira bele hola barak kedas maibé agora redús hotu.

“Ami-nia rendimentu uluk di’ak maibé agora tun makas to’o 30%. La hanesan uluk, loron ida ita bele faan to’o rihun ualu, maibé agora loron ida rihun haat mós la to’o. Tanba ne’e, Governu liuhosi Ministériu Turizmu Komérsiu no Indústria (MTCI), Ministériu Koordenadór Asuntu Ekonomia (MCAE) no Ministériu Transporte no Komunikasaun (MTK), atu tuur hamutuk hodi haree, solusaun saida mak atu foti. Iha ró tama mai Timor karik, ita tenke bolu sira hotu, tanbasá Atambua no Kupang ró agora folin tun, nusa Timor nian sa’e $250 halo $1500,” nia dehan.

Prezidente TANE Konsumidór, António Ramos da Silva ‘Naikoli’, hateten sasán nia folin sa’e, iha fatór barak mak kontribui, dahuluk tanba folin iha merkadu mundiál.

Tanba, Timor-Leste la’os país prodús mina-tein naton hodi konsumu maibé Timor-Leste importa barak liu produtu alimentar sira, liuliu mina-tein tanba produsaun interna la naton atu sustenta merkadu sá tan ba konsumu.

“Tanba ne’e, mak ita dependénsia barak ba iha importansaun. Bainhira, produsaun nia importsasaun diminui klaru katak afeta ba demanda iha merkadu no nia konsekuensia barak liu ba konsumu,” nia afirma.

Iha parte seluk, nia dehan, tanba akompaña ho funu hosi Rusia no Ukraina nia impaktu ba liu folin sasán iha merkadu sa’e, tantu iha mina-tein no kombustivel sa’e hotu.

“Hosi ne’e, oportunidade oinsá mak atu insentiva produtór nasionál sira bele halo produsaun ba parte mina-tein, hodi sai hanesan alternativa ida ka sustitui ba importansaun. Parte ne’e, kabe ba Governu, iha polítika ida, liuhosi fó subsidiu ba produtór sira hodi transforma nuu ba mina-nuu no mós ba mina sira seluk,” nia dehan.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here