Vise-Ministru Saúde, Bonifácio Maucoli dos Reis hamutuk ho diretora ezekkutivu HAMNASA, Timor-Leste Xylia Ingham asina akordu ho global fund no Ministeriu saude. Iha Ministériu Saúde Caicoli, Segunda (13/06). Imajen Tatoli /Egas Cristóvão

DILI, 13 juñu 2022 (TATOLI)— Vise-Ministru Saúde, Bonifácio MauColi dos Reis, segunda ne’e, selebra akordu ho Organizasaun Naun Govermentál (NGO,sigla inglés) HAMNASA nu’udar parte ba dala-uluk hodi fó asisténsia tékniku ba kombate moras Tuberkuloze, Malaria no HIV/ SIDA iha Timor-Leste.

Biban ne’e, Vise Bonifácio Maucoli dos Reis, espresa apresiasaun aas tebes ba inisiasaun brillante husi Programa Nasionál Tuberkuloze (TB) no ekipa Diresaun Fundu Globál –Ministériu Saúde ne’ebé maka selesiona Asosiasaun HAMNASA nu’udar sub-resipiente foun, hanesan parseiru foun ba TB hodi kombate no hapara TB liuhusi sira-nia intervensaun estratéjiku foun.

”Kazu tuberkuloze no HIV/AIDS ita hatene kazu insidénsia ne’ebé ho volume aas, nune’e liuhosi apoiu Fundu Globál CCM-TL nian asina akordu ho NGO HAMNASA atu bele suporta ita oinsá atubele kombate moras tuberkuloze no HIV/SIDA iha ita-nia rain,”Vise Ministru Saúde Maucoli hateten, hafoin ramata asina akordu iha salaun-MS Caicoli.

Governante ne’e mós iha espetativa katak ho akordu ne’e bele iha kapasidade atu servisu no masimiza rekursu ne’ebé disponivél la’ós kobre de’it Sentru Saúde Komunitária iha Munisipiu Dili identifikadu maibé mós iha posibilidade atu hala’o servisu ba HNGV no Sentru Saúde Komunitária sira-ne’ebé besik liu hanesan iha Liquiçá, Maubára, Railaco, Gleno, Manatuto, Laleia no Vemasse iha futuru.

Intervensaun ida-ne’e sei suporta Ministériu Saúde ho objetivu prinsipál ne’ebé maka tenke alkansa liuhusi deklarasaun atu HAPARA TB iha tinan 2025 mai.

Ministériu Saúde tau iha konsiderasaun no rekoñese katak kolaborasaun no kooperasaun mútua ho parseiru dezenvolvimentu, parte interesadu, ajénsia nasaun unida, ajénsia doadór sira maka pertinente tebes atu alkansa vizaun, misaun no meta ne’ebé define tiha ona iha Planu Estratéjiku Dezenvolvimentu Nasionál Setór Saúde tinan 2011 – 2030.

Governante ne’e mós hakarak mós atu espressa ami-nia sentidu no profundu gratidaun ba apoiu no kooperasaun kontínua ne’ebé fornese hosi Fundu Globál ba Timor-Leste liuhusi Mekanismu Koordenasaun ba Nasaun Timor-Leste (CCM-TL), objetivu atu hadi’ak komunidade Timor-Leste nia saúde no moris di’ak iha nível nasionál, munisipál, postu administrativu, suku no aldeia ikusliu maka komunidade no família ida idak-idak.

Partikularmente atu kombate moras kontajioza tolu maka hanesan Malária, TB no HIV/AIDS. Durante tinan 20 nia laran depoisde Timor-Leste Restaura ninia Independénsia, insídensia ba HIV no TB aumenta ho maka’as tebes enkuantu kazu malária relata iha redusaun desde tinan 2006 husi kazu 223,002 ba kazu 14 iha 2020.

Timor-Leste agora daudaun tama ona iha faze ba deklarasaun eliminasaun malária husi Organizasaun Mundiál Saúde, Enkuantu programa HIV/AIDS hala’o esforsu tomak atu elimina infesaun transmisaun husi inan ba oan no TB tuir nia dalan atu bele elimina iha fins de 2025.

Taxa Insidénsia ba TB maka 508/100,000 populasaun no taxa mortalidade TB maka 106 per 100,000 populasaun.

“Dadus ne’e hatudu mai ita katak Timor-Leste nu’udar nasaun daruak ho taxa insidénsia ba TB no nasaun dahuluk ho taxa mortalidade TB entre estadu membru 11 iha Rejiaun Sudeste Aziátiku nian (SEAR) hanesan mós taxa insidénsia dahitu no taxa mortalidade dalima iha mundu/global,” Vise Ministru Saúde salienta.

Atu redus númeru sira-ne’e, Timor-Leste liuhusi kompromisu VIII Governu Konstitusionál deklara atu HAPARA TB iha 2025 ne’ebé maka deklara diretamente husi Primeiru-Ministru, Taur Matan Ruak iha Setembru 2021.  Tuir fali Prezidente Repúblika, Francisco Lu-Olo iha RAEOA no deklarasaun Vise-Ministru Saúde Bonifácio Mau Coli dos Reis iha Illa Atauro Livre husi TB.

Desde tinan 2005, Ministériu Saúde hetan konsesaun maizumenus  milaun $100. CCM-TL selesiona Ministériu Saúde nu’udar resipiente prinsipál no dezembolsa fundu aproximadamente milaun $80 atu kombate malária, HIV/AIDS no TB iha Timor-Leste. Entre tinan 2021 too 2023.

Fundu Globál garante alokasaun fundu besik milaun $15.7 ba Ministériu Saúde, ne’ebé $3,465, 299 sei utiliza hodi kombate HIV/AIDS, $3,937,840 ba malária enkuantu $8,348,220 ba TB inklui investimentu ba Sistema Rezilénsia no Sustentavel ba Saúde no fundu adisionál husi C19RM ho totál montante $5.4 hodi responde ba COVID-19 iha tinan 2021 liubá.

Diretora Ezekkutivu HAMNASA, Timor-Leste Xylia Ingham Imajen Tatoli /Egas Cristóvão

Iha fatin hanesan, Diretora Ezekutiva NGO HAMNASA, Xylia Ingham, hateten, NGO HAMNASA apoiu karreta atu utiliza ba servisu kombate tuberkuloze, malária no HIV/SIDA iha Timor-Leste.

”Karreta ne’ebé ami apoiu halao servisu iha Dili laran tanba projetu ne’e foka liu ba munisípiu Dili tanba moras tuberkuloze dala barak fó impaktu ba inan no oan sira ne’ebé mak hetan má nutrisaun no moras nomós inan ne’ebé afeta moras anemia entaun sira ne’e fasil atu hetan moras tuberkoloze,” nia hatutan.

Jornalista: Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here