Diretór Servisu Saúde Munisípiu Baucau, Domingos Reinaldo da Costa Guterres. Imajen Tatoli/Natalino Belo.

BAUCAU, 13 maiu 2022 (TATOLI) – Ministériu Saúde presiza kompleta rezidénsia iha postu saúde sira iha baze nune’e pesoál sira bele halo atendimentu ba komunidade ho rútina.

Diretór Servisu Saúde Munisípiu Baucau, Domingos Reinaldo da Costa Soares, hateten, infraestrutura bázika importante atu halo melloramentu atendimentu saúde ba komunidade maibé tenke kompleta uma ba pesoál saúde sira tanba iha postu no sentru saúde kuaze barak mak seidauk iha.

“Importante tebes tanba infraestrutura fasilita pesoál saúde ne’ebé destakadu bele utiliza hodi halo atendimentu ba komunidade, presiza mós pesóal saúde sira atu destaka ba área rurál tanba seidauk sufisiente,” Diretór Servisu Saúde Baucau hateten iha Vila Antiga, segunda ne’e.

Servisu saúde munisipál Baucau rasik identifika ona fatin ka área sira-ne’ebé presiza atu fó atensaun relasiona ho fasilidade ba pesóal saúde sira-ne’ebé destaka hodi halo atendimentu médika ba komunidade sira iha baze.

Fatin hirak-ne’e hanesan postu administrativu Baguia, iha postu saúde Uacala, Baucau vila iha suku Seiçal, postu saúde Age, postu Quelicai hamutuk tolu hanesan sentru saúde Bualale ne’ebé daudaun ne’e hahú konstrusaun, Laisorulai sei konstrui sentru saúde no Lelalai.

“Iha tán sentru saúde ne’ebé ita hakarak kompleta maibé depende ba orsamentu, mesmu dezeñu planu konstrusaun ita prepara ona maibé fila ba orsamentu jerál estadu,” Domingos Guterres akresenta.

Servisu saúde Baucau hato’o ona pedidu ba Ministériu Saúde (MS) bazea ba mapeamentu no planu no autoridade munisipál liuhosi Planu Intergradu Dezenvolvimentu Munisipál (PDIM).

Nia fundamenta, profisionál saúde ne’ebé destaka komposta hosi parteira, médiku no enfermeiru tuir númeru komunidade iha área destaka ba hanesan populasaun menus hosi ema na’in-5.000 sei destaka ema na’in-tolu, ne’ebé hanaran postu tratamentu no liuhosi númeru refere sei destaka ema na’in-lima iha postu saúde.

“Atu kompleta pesóal saúde iha postu saúde no postu tratamentu depende ba Ministériu Saúde tuir alokasaun orsamentu,” Domingos Guterres argumenta.

Servisu saúde Baucau liuhosi inkontru sempre hato’o pedidu kona-ba infraestrutura no rekrutamentu pesóal saúde sira atu destaka ba sentru saúde, postu saúde no postu tratamentu iha munisípiu Baucau.

Proseu rekrutamentu iha rejime jerál kompostu hosi cleaner no seguransa ne’ebé kabe ba kompeténsia autoridade munisipál no rejime espesiál ne’ebé kompostu hosi médiku, parteira, enfermeira, saúde públiku no tékniku aliadu hanesan analista, farmasista, nutrisionista no dentista responsabiliza hosi Ministériu Saúde.

Totál médiku iha munisípiu Baucau hamutuk na’in-69, parteira na’in-60 no enfermeira na’in-59, hosi tótal sentru saúde sia no postu saúde hamutuk 28.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here