iklan

EDUKASAUN, HEADLINE

MEJD harii sentru 170 ba EPE 400 ho kustu millaun $10

MEJD harii sentru 170 ba EPE 400 ho kustu millaun $10

Reitor Institute Of Busines (IOB), Pedro Ximenes. Imajen Tatoli/Sergio da Cruz

DILI, 13 juñu 2022 (TATOLI)–Ministériu Edukasaun Juventude no Desportu (MEJD) harii ona sentru 170 ba Ensinu Pré-Eskolár (EPE) 400 ho kustu millaun $10, ne’ebé finansia hosi Governu Nova Zelándia hodi apoiu atividade labarik sira iha programa halimar aprende no deskobre susesu (HANDS).

“Ita hatene katak edukasaun Pré-Eskolár ne’e la’ós obrigatóriu, maibé Ensinu Báziku maka obrigatóriu. Ita-nia Governu hakarak apoiu labarik sira molok hakat ba Ensinu Báziku, sira bele prepara ona,” Koordenadór programa HANDS, Pedro Ximenes, informa iha salaun enkontru ETDA, segunda ne’e.

Notísia relevante: Nova Zelándia apoiu materiál ba estudante Pre-Eskolár reforsa programa HANDS

VIII Governu liuhosi MEJD kria programa HANDS atu aselera prosesu dezenvolvimentu labarik, tanba tuir planu ministériu to’o 2030, númeru labarik ne’ebé asesu ba EPE tenke atinje 30%.

“Dadus ne’ebé rejista iha programa HAND, númeru matríkula ba labarik sira tama ona iha EPE hamutuk 25 to’o 27%, enkuantu sira ne’ebé seidauk tama hamutuk 75%, ne’ebé programa ne’e rasik foka liu ba labarik Ensinu Pré-Eskolár,” nia akresenta.

Nune’e mós, atuál Reitór Institute of Bussiness (IOB) ne’e dehan, EPE ne’ebé harii daudaun iha país ne’e iha modelu rua, ida rejista iha ministériu ne’ebé konsidera nu’udar EPE públiku no seluk privadu, ne’ebé tuir dadus ne’ebé HANDS rekolla, eziste EPE 400 resin ho modelu rua, no totál labarik iha ensinu ne’e hamutuk 30.000 to’o 35.000.

Programa HANDS ne’e aleinde foku ba koñesimentu labarik sira-nia iha nível EPE, iha mós pontu importante balun maka tenke atinje hodi tulun labarik sira maka hanesan formasaun ba profesór sira, ne’ebé programa ne’e serbisu hamutuk mós ho INFORDEPE atubele hetan formasaun di’ak hodi hanorin fali labarik sira.

Programa ne’e halo kriasaun ba fatin halimar labarik sira ne’ebé serbisu hamutuk ho Programa Nasionál Dezenvolvimentu Suku (PNDS) hodi harii fatin halimar ba labarik sira, ne’ebé daudaun ne’e iha ona sentru 170 fatin halimar mak instala ona no tuir planu ba tinan ne’e sei konklui tan sentru 200.

Iha sorin seluk, programa HANDS ne’e rasik halo mós monitorizasaun ba sentru halimar sira atu fasilidade ne’ebé la adekuadu bele iha rekomendasaun ba MEJD atu konklui fasilidade sira ne’e.

Entretantu fatin halimar sira ne’ebé harii ba labarik sira ne’e instala duni iha área eskola sira atu labarik bele utiliza ba sira-nia atividade diária.

Atividade ne’e kria hosi Governu Timor-Leste liuhosi MEJD maibé programa ne’e benefisia hosi Governu Nova Zelándia, atu nune’e bele tulun labarik timor-oan sira iha territóriu nasionál bele asesu di’ak liután ba EPE durante tinan-lima nia laran.

Jornalista : Tomé Amado  

Editora     : Julia Chatarina

iklan
iklan

Leave a Reply

iklan
error: Content is protected !!