Diretór Ezekutivu SERVE, Florêncio Sanches. Imajen Tatoli/Jogerjo Guterres

DILI, 13 juñu 2022 (TATOLI)–Diretór Ezekutivu Servisu Rejistu no Verifikasaun Emprezariál, Institutu Públiku (SERVE, I.P), Florêncio Sanches, hateten, lei númeru 10/2017 kona-ba sosiedade komersiál bandu ajénsia viajen halo rekrutamentu ba ema sira hodi ba serbisu iha rai-li’ur.

“Lei la fó dalan atu ajénsia viajen sira halo rekrutamentu, bainhira komunidade hetan ajénsia viajen halo fali rekrutamentu ne’e labele, ajénsia rekrutamentu ketak regula iha dekretu-lei 34/2017, kona-ba rekrutamentu, ajénsia ida halo viajen ne’e mós ketak ida, rua ne’e ajénsia hotu maibé labele lori sertifikadu ida ba taka fali sertifikadu seluk maibé lei permite sé de’it ne’ebé iha ona nia aktu distribui iha statutu bele husu atu ezerse atividade ida-ne’e, maibé labele lori sertifikadu ida ajénsia viajen nian halo fali rekrutamentu,” Diretór informa ba Agência Tatoli, iha salaun Ministériu Solidariedade Sosiál no Inkluzaun (MSSI), Caicoli, segunda ne’e.

Maski nune’e, Diretór Ezekutivu ne’e nota katak daudaun ne’e iha ajénsia viajen balun halo rekrutamentu ba ema hodi ba sevisu iha rai-li’ur.

Notísia relevante: Ajénsia Cammer PC fasilita timor-oan 4.000 serbisu iha Irlandia no Inglatera

Tanba ne’e, SERVE, I.P husu ba komunidade ne’ebé utiliza hela servisu sira ne’ebé ajénsia fornese atu haree didi’ak katak ajénsia ba viajen la hanesan ho ajénsia rekrutamentu.

“Atu klarifika tan katak, lei la permite ema utiliza sertifikadu ajénsia viajen ninian ba fali ajénsia rekrutamentu, lei mós la permite entidade ida bolu ninia grupu halo ida-ne’e, maibé lei permite katak sira livre atu foti maibé tenki rekere lai iha SERVE no servisu rejistrasaun uza nia kompeténsia tomak halo verifikasaun katak merese ka lae. Ha’u hetan tiha ona balun ne’ebé ita presiza tuur hamutuk hodi rezolve ida-ne’e”, nia tenik.

SERVE, I.P rejista ajénsia viajen inklui ospitalidade hamutuk 200 resin, enkuantu ajénsia rekrutamentu la to’o 50.

“Ajénsia ne’ebé loke atu halo rekrutamentu tenki iha sertifikadu hosi SERVE no Institutu Nasionál Dezenvolvimentu Mão-de-Obra (INDMO), sein sertifikadu no halo koordenasaun ho Ministériu Negósiu Estranjeiru no Kooperasaun (MNEK), kuandu seidauk hetan sertifikadu hosi instituisaun rua ne’e mak proibidu,” nia fó hanoin.

SERVE simu keixa hosi populasaun katak iha ajénsia balun uza ajénsia viajen halo rekrutamentu.

“Ami simu keixa maibé la’ós kompeténsia SERVE atu interven, ami halo verifikasaun katak entidade loos ka la loos atu halo rekrutamentu ne’e, maibé  presiza mós koordenasaun entidade seluk hanesan Sekretaria Estadu Formasaun Profisionál no Empregu (SEFOPE), Ministériu Negósiu Estranjeiru no Kooperasaun (MNEK) no Ministériu Transporte no Komunikasaun (MTK) atu haree ida-ne’e, hafoin maka bolu SERVE hodi halo identifikasaun,” nia tenik.

Tuir Diretór Ezekutivu, keixa ne’ebé SERVE simu, ajénsia viajen ne’ebé halo rekrutamentu ne’e ilegál, tanba-ne’e maka hanesan entidade Estadu presiza tau ideia hamutuk atu salva sidadaun sira atu labele sai vítima.

“Ha’u halo verifikasaun informál no ha’u haree ho matan no kaer ho liman ba dadus sira ne’ebé halo hela buat ne’e la loos, maibé tanba ha’u labele publika, ha’u hein ministériu kompetente atu foti desizaun, SERVE tama iha laran para rezolve legalidade,” nia adianta.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here